Julia Mendel, ish-zëdhënëse e Presidentit ukrainas Volodymyr Zelensky, ka rrëfyer në një podcast me Tucker Carlson për përvojën e saj dhe vlerësimet mbi kreun e shtetit. Mendel tha se punoi për Zelenskyn nga 2019 deri në 2021, pas një procesi seleksioni ku konkuruan rreth 4,000 veta, dhe se në fillim e mbështeti, përfshirë gjatë pushtimit rus të vitit 2022, kur e vlerësoi qëndresën e tij. Megjithatë, ajo deklaron se nuk ka hakmarrje personale dhe se është e detyruar t’u tregojë njerëzve se “kush është ai në të vërtetë”.
Mendel përshkruan Zelenskyn si të ndryshueshëm: në paraqitjet publike shfaqet si “arush i butë”, por pas kamerave sipas saj bëhet “ari i egër”. E akuzon për mungesë empatie, emocionim të pakontrolluar, manipulim dhe për përhapje të deklaratave që distancohen nga realiteti. Sipas saj, aktrimi i tij solli mbështetje perëndimore në 2022, por retorika heroike nuk fsheh grumbullimin e pushtetit dhe dëmin që, sipas Mendel, ai po u shkakton qytetarëve që pretendon se po shpëton. Ajo e quajti Zelenskyn “një nga pengesat më të mëdha për paqen” dhe tha se mënyra e vetme për të mbështetur Ukrainën sot është nxitja e një marrëveshjeje paqeje, pasi sipas saj vendi rrezikon zhdukjen.
Mendel nuk justifikon pushtimin rus dhe e cilëson veprimin e ushtrisë ruse si krim kundër njerëzimit, por thekson se lufta nuk është “bardh e zi”. Ajo paraqiti vlerësime demografike: zyrtarisht Ukraina ka 40–42 milionë banorë, por regjistrimi i fundit daton rreth 2000/2001; më parë qeveria vlerësonte 34–37 milionë, ndërsa tani mund të jenë rreth 25 milionë brenda vendit për shkak të më shumë se 10 milionë refugjatëve dhe territorëve të pushtuara. Sipas saj, rreth 11 milionë janë pensionistë me pensione të ulëta (75–180 dollarë në muaj) dhe përmendi raste tragjike të vdekjes nga mungesa e ndihmës.
Për numrin e të vrarëve, Mendel tha se statistikat zyrtare (OKB) flasin për rreth 15,000 civilë, por numri real mund të jetë në qindra mijëra; vuri në dukje varret në Mariupol dhe vështirësitë për verifikim në territore të pushtuara. Ajo akuzoi gjithashtu Zelenskyn se qëndron pas skemave të pastrimit të parave, duke rrefyer një rast ku një kandidat për Ministrinë e Politikave Sociale iu kërkua të mendonte skema pastrimi parash gjatë një interviste me Zelenskyn dhe shefin e tij të kabinetit, Andriy Yermak. Mendel e përfundoi intervenimin me një pyetje për publikun lidhur me përgjegjësinë e presidentit.
