Majlinda Dhuka, kryenegociatorja e Shqipërisë për integrimin europian, paraqiti në Komisionin për Evropën dhe Punët e Jashtme bilancin e punës për procesin e negociatave gjatë vitit 2025 dhe katërmujorit të parë të 2026. Ajo nënvizoi mbështetjen e Komisionit dhe të Parlamentit Europian për Shqipërinë, dhe bëri me dije se BE-ja ka paraqitur 101 kushte për mbylljen e negociatave për 31 kapituj.
Dhuka sqaroi se gjatë vitit 2025 është punuar mbi bazën organizative të procesit të mbylljes së negociatave dhe në çeljen e negociatave për gjashtë grup-kapituj. Janë hartuar 31 draft plane pune që zbërthejnë 101 linja veprimi në rreth 600 nisma europiane, prej të cilave një pjesë e konsiderueshme janë të natyrës ligjore. Ajo vlerësoi vitin 2025 si një vit me progres të jashtëzakonshëm në negociata.
Kryenegociatorja theksoi se fokus është padyshim te kushtet për mbylljen e negociatave, por edhe te kushtet e ndërmjetme dhe progresi i bërë në shtetin e së drejtës, luftën kundër korrupsionit, krimit dhe të drejtave të njeriut. Në fazën aktuale po zhvillohen përgatitje teknike intensive për mbylljen e negociatave, duke filluar me 10 fushat e para, por duke punuar paralelisht në të gjithë 31 fushat. Puna e strukturës negociuese është përqendruar te rritja e kapaciteteve, roli i pushtetit qendror, si dhe konsultimi dhe dialogu social në lidhje me nismat europiane.
Dhuka përmendi përfshirjen e rreth 157 institucioneve në përgatitjet për anëtarësim dhe theksoi bashkëpunimin e ngushtë ndërmjet tyre. Ajo prezantoi linjat prioritare të negociatave: tregu i brendshëm, ku negociatat u çelën në prill 2025 dhe konsiderohet etapë strategjike; si dhe fusha e konkurrueshmërisë dhe përfshirjes, që u hap në maj 2025. Fokusi kryesor në këto grupe do të jetë transformimi digjital, mbështetja për sipërmarrjen, punësimi dhe politika sociale.
Sipas Dhukës, Shqipëria ka punuar për të plotësuar 24 fusha të ndërmjetme në drejtësi dhe siguri dhe ka marrë vlerësim pozitiv; diskutimet ndërmjet vendeve anëtare vazhdojnë dhe Shqipëria pret me interes rezultatet e tyre.
