Instituti i Shëndetit Publik (ISHP) njofton se në Shqipëri nuk ka asnjë rast të konfirmuar me hantavirus dhe se riski për përhapjen e këtij virusi në vend është i ulët. Në një deklaratë zyrtare për mediat, ISHP thekson se nuk ka vend për panik dhe se sistemi shëndetësor është i përgatitur për zbulimin në kohë të çdo rasti të dyshuar, si dhe për izolimin dhe monitorimin e kontakteve.
Epidemiologu Artan Simaku bëri me dije se riski për Shqipërinë dhe për kontinentin evropian është shumë i ulët, dhe se nuk ka asnjë kufizim të udhëtimeve apo të tregtisë, si për shtetasit shqiptarë, ashtu edhe për qytetarët europianë. Ai shpjegoi se vlerësimi i rrezikut bazohet në disa kritere, përfshirë faktin se lloji i brejtësit që strehon virusin Andes, i lidhur me shpërthimin në një anije turistike, nuk gjendet në Shqipëri e as në Europë.
ISHP sqaroi gjithashtu se hantaviruset përbëjnë një grup virozash: lloji i identifikuar në anijen turistike raportohet se transmetohet vetëm përmes kontakteve të ngushta dhe të gjata familjare nga njeriu tek njeriu, ndërsa llojet e tjera që qarkullojnë në Shqipëri nuk transmetohen midis njerëzve. Për pasojë, rreziku i përhapjes së infeksionit përmes përhapjes së atij lloji specifik në territorin shqiptar vlerësohet si i ulët.
Pavarësisht kësaj vlerësimi të ulët të rrezikut, institucionet shëndetësore shqiptare kanë marrë masa për të siguruar identifikimin dhe menaxhimin e rasteve të dyshuara, përfshirë procedurat e izolimit dhe ndjekjen e kontakteve. Deklarata e ISHP-së synon të qetësojë publikun dhe të informojë përgatitjen dhe gatishmërinë e sistemit shëndetësor në rast se do të shfaqen raste të dyshuara. Top Channel.
