Shërbimet sekrete evropiane raportojnë se mund të ketë qarqe të elitës ruse që përgatisin një komplot kundër Vladimir Putin, me vëmendje të veçantë te ish-ministri i Mbrojtjes Sergei Shoigu. Si pasojë, Kremlini ka forcuar ndjeshëm masat e sigurisë për shkak të rrezikut të vrasjes ose një grushti shteti, sipas Important Stories, CNN e Financial Times. Analistët janë të ndarë: disa i shohin skenarin si të mundshëm në kontekstin historik rus dhe veprimeve të shërbimeve të huaja, ndërsa të tjerë paralajmërojnë se pretendimet mund të jenë lojë e dyfishtë e Kremlinit për të justifikuar spastrimet brenda elitës.
Raporti përmend Shoigun si një “faktor potencial destabilizues”. Megjithëse ndikimi i tij po dobësohet, ai dikur udhëhiqte një rrjet të gjerë të lidhur me institucionet e emergjencave dhe ministrinë e mbrojtjes. Pas shkarkimit të tij në vitin 2024, disa bashkëpunëtorë të tij janë arrestuar e ndëshkuar: ish-zëvendësministri Ruslan Talikov u arrestua për “organizatë kriminale” dhe korrupsion, Timur Ivanov u dënua me 13 vjet, dhe ndaj të tjerëve si Pavel Popov dhe Dmitry Bulgakov vazhdojnë procedurat penale. Këto arrestime theksojnë frikën se Shoigu mund të përballet me fatin e bashkëpunëtorëve të tij.
Edhe Putini ka rritur masat: është bërë më e vështirë që dikush të afrohet i armatosur, por ai mbetet i ekspozuar ndaj kërcënimeve si sulmet me dron. Për shkak të shqetësimeve, paralaja tradicionale në Sheshin e Kuq u zhvillua më e vogël, komunikimet u ndërprenë në disa zona, u vendosën sisteme luftimi elektronik dhe siguria e brendshme e Kremlinit u rrit. Politologët vënë re se Putini ka zvogëluar paraqitjet publike.
Ekspertë të ndryshëm ofrojnë interpretime kundërthënëse: disa e përshkruajnë situatën si përçarje midis klaneve dhe shërbimeve të sigurisë që preferojnë të presin zhvillimet, jo konflikt të hapur; Mark Galeotti e konsideron si dezinformim që synon të nxisë paranojë brenda elitës; Aleksandra Prokopenko shpjegon se elita është e ndarë në klientela rreth patronëve dhe se konflikti do të rritet nëse burimet zvogëlohen. Lufta dhe sanksionet kanë zvogëluar burimet, rritin konkurrencën për aksesin dhe minojnë stabilitetin e koalicionit në favor të ushtrisë dhe industrive të lidhura me të.
