Tensioni ka shoqëruar përgatitjet për ndeshjen vendimtare mes Tiranës dhe Elbasanit, e cila sapo ka nisur në “Elbasan Arena”. Një numër i madh tifozësh të Tiranës kanë ardhur për të mbështetur skuadrën, gjë që ka krijuar radhë të gjata në hyrje dhe ka bërë që dy tifozeritë të gjenden pranë njëra‑tjetrës. Rivaliteti mes tifozive të këtyre dy ekipeve dihet si i ashpër dhe shpesh i dhunshëm, ndaj situata para ndeshjes ishte e tensionuar.
Para fillimit të takimit është regjistruar një incident kur disa tifozë u përplasën me njëri‑tjetrin. Dhuna nuk u ndal vetëm jashtë, por ka vazhduar brenda stadiumit, ku dhjetëra tifozë kanë hyrë në fushë. Sipas informacioneve paraprake, një grup tifozësh nga kryeqyteti u përfshi në akte dhune dhe përplasje pranë ambienteve të stadiumit, duke krijuar momente paniku dhe tensioni mes tifozerive.
Në zonë ndërhynë forca të shumta policie për të neutralizuar situatën dhe për të shmangur përshkallëzimin e incidenteve. Hyrja e tifozëve në stadium u shoqërua me masa të forta sigurie, ndërsa organizimi i hyrjeve dhe kontrolli i terrenit qenë të shtuar për shkak të numrit të madh të mbështetësve dhe tensionit ndërmjet dy grupimeve.
Pavarësisht ndërhyrjeve të policisë dhe masave të sigurisë, atmosfera pritet të mbetet e ndezur, si në tribuna ashtu edhe në fushën e lojës, për shkak të rivalitetit të theksuar mes tifozive dhe ngjarjeve që paraprin ndeshjen. Ndeshja vazhdon në “Elbasan Arena” ndër masa të rrepta sigurie dhe me prezencë të konsiderueshme të tifozëve, ndërsa forcat e rendit qëndrojnë në gatishmëri për të parandaluar incidente të mëtejshme.
