Shtetet e Bashkuara presin përgjigjen e Iranit ndaj propozimit të fundit amerikan për paqe, ndërsa armëpushimi i brishtë midis palëve vazhdon të mbahet në fuqi. Presidenti Donald Trump deklaroi se pret “shumë shpejt” një reagim nga Teherani për draftin që synon t’i japë fund luftës dhe të hapë rrugën për negociata më të detajuara.
Gjatë ditës së shtunë, Trump ndoqi Turneun e Golfit në Virxhinia dhe në rrjetin e tij social Truth Social publikoi një seri postimesh që alternonin mes zhvillimeve politike dhe mesazheve personale. Ai shpërndau dy foto të krijuara me inteligjencë artificiale që paraqisnin anije të fundosura, të drejtuara ndaj flotës detare të Iranit, si dhe një tjetër ku shfaqet Trump duke vëzhguar me dylbi anije që shpërthejnë në det, me mesazhin se “kjo është ajo që e pret Iranin nëse nuk pranon marrëveshje”.
Presidenti gjithashtu riktheu sulmet ndaj ish-drejtorit të FBI-së, James Comey, i cili pritet të dalë në gjyq më 15 korrik; Trump komentoi: “A ka njeri që e beson këtë polic të pistë”.
Në planin diplomatik, zyrtarët amerikanë intensifikuan kontaktet për të siguruar arritjen e një marrëveshjeje. Sipas raportimeve të Axios, Sekretari amerikan i Shtetit, Marco Rubio, dhe i dërguari i Shtëpisë së Bardhë, Steve Witkoff, patën një takim në Miami me kryeministrin e Katarit, Mohammed bin Abdulrahman Al Thani. Katari po luan një rol kyç ndërmjetësues midis Uashingtonit dhe Teheranit, në përpjekje për të shmangur përshkallëzimin e mëtejshëm të konfliktit dhe për të garantuar vijimin e armëpushimit.
Burime të njohura me negociatat bëjnë me dije se SHBA-ja dhe Irani po diskutojnë një memorandum paraprak që do të shërbente si bazë për një marrëveshje më të gjerë politike dhe ushtarake. Sipas këtyre burimeve, dokumenti synon jo vetëm ndalimin e përplasjeve, por edhe krijimin e një kuadri të qëndrueshëm negociatash për normalizimin e situatës në rajon.
