Në mbyllje të javës, Kryeministri Edi Rama renditi në Podcastin e tij “Flasim” disa zhvillime kryesore lidhur me rrugëtimin europian të Shqipërisë, duke i cilësuar pjesë të një procesi “të pandalshëm” reformash dhe transformimesh që po e afrojnë vendin me anëtarësimin në Bashkimin Europian. Rama vuri në dukje se më 9 maj, në Ditën e Europës, Shqipëria “e gjeti veten më pranë se kurrë” BE-së dhe se për herë të parë pas shumë dekadash rruga drejt unionit nuk duket si një horizont i largët, por si një majë e arritshme brenda kohës në dispozicion.
Ai deklaroi se negociatat kanë avancuar me ritëm, kapitujt janë hapur “në kohë rekord”, dhe marrëdhënia me Bashkimin Europian ndërtohet “ditë pas dite me rezultate konkrete”. Sipas kreut të qeverisë, Komisioni Europian dhe vendet anëtare, përmes ambasadorëve të tyre, ndodhen në një fazë kyçe ku diskutohet raporti i Komisionit, i cili, sipas Ramës, nënvizon se Shqipëria i ka plotësuar detyrat e shtëpisë dhe është e gatshme të hyjë në fazën e mbylljes së kapitujve, duke kaluar përmes piketave të ndërmjetme.
Rama theksoi se ky progres “nuk ka ardhur rastësisht”, por me punë dhe rezultate, si pjesë e një procesi transformues që vazhdon në çdo sektor. Ai listoi reforma dhe ndryshime konkrete: reforma në drejtësi, transformimi i administratës, digjitalizimi i shërbimeve, modernizimi i ekonomisë, investimet dhe transformimet në energji e infrastrukturë, si dhe vendosja e standardeve të reja në sektorët strategjik. Sipas tij, këto nuk janë elemente të shkëputura apo “lista fjalësh” pa përmbajtje, por hallka të një zinxhiri që ndërton “shtetin europian të shqiptarëve”.
Për këtë arsye, 9 maji nuk është vetëm festa e Europës, por një moment për të ndjerë “një ndjenjë legjitime krenarie” dhe për të vazhduar përpjekjet drejt arritjes së “majës” që, sipas Ramës, tani është më e arritshme “më thjeshtë” dhe vetëm me angazhim dhe vullnet — fjalë që ai përsëriti tri herë: “angazhim, angazhim, angazhim dhe vullnet, vullnet, vullnet”.
