Në Sheshin e Kuq, përshfaqja e fuqisë ushtarake ruse u realizua kryesisht përmes ekranëve gjigantë dhe materialeve të parafabrikuara, duke krijuar një imazh të kontrolluar të festimeve të Ditës së Fitores. Monitorët me video propagandistike ishin shtuar në numër krahasuar me vitet e mëparshme, ndërsa imazhet nga fronti dhe njësitë ushtarake dominuan ceremoninë.
Parada përfshiu gjithashtu pjesëmarrjen simbolike të ushtarëve nga Koreja e Veriut, të cilët marshuan së bashku me njësitë ruse, dhe u prezantuan operatorët e dronëve si pjesë e “sistemeve pa pilot”. Ceremonia zgjati 46 minuta, ndërsa fjalimi i presidentit Vladimir Putin ishte rreth 8 minuta e 33 sekonda, më i shkurtëri në pesë vitet e fundit.
Në fjalimin e tij, Putin theksoi unitetin kombëtar dhe sakrificat e popullit rus, duke përmendur ushtarë, punëtorë, mjekë, inxhinierë dhe kategori të tjera shoqërore si pjesë të përpjekjes së përbashkët për “fitore”. Ai deklaroi se Rusia po përballet me një “forcë agresive të mbështetur nga NATO” dhe përsëriti që vendi do të vazhdojë të qëndrojë i bashkuar përballë sfidave.
Analistët vëzhguan se thirrjet për unitet vijnë në një kohë kur apatia dhe zhgënjimi publik janë rritur për shkak të zgjatjes së konfliktit në Ukrainë dhe vështirësive ekonomike që po përjeton vendi. Sipas komenteve të cituara nga media shtetërore RIA Novosti, narrativi zyrtar paraqet fitoren si një proces të vazhdueshëm përballjeje me Perëndimin, duke e lidhur të ardhmen e Rusisë me konfliktin aktual dhe ndikimin e tij në rajon.
Pavarësisht deklaratave të forta politike, ceremonia u përshkrua si më e shkurtër dhe më e përmbajtur se vitet e mëparshme, një ndryshim në tonin e festimeve tradicionale të 9 Majit në Moskë.
