Një dosje e dhjetorit të vitit 1947 përmban një seri raportimesh për “disqe fluturuese”, ndërsa një raport inteligjence i Forcave Ajrore i klasifikuar “tepër sekret” nga nëntori i 1947 përmban informacione mbi raportime për “mjete ajrore të paidentifikuara” dhe “pjata fluturuese”. Në dokumente theksohet shqetësimi zyrtar ndaj fenomenit; sipas një dokumenti, “Raportimet e vazhdueshme dhe të fundit nga vëzhgues të kualifikuar lidhur me këtë fenomen e bëjnë këtë çështje ende shqetësuese për Komandën e Materialeve Ajrore”. Një raport tjetër shprehet se “Prej disa kohësh kemi qenë të shqetësuar nga raportimet e përsëritura për pjata fluturuese”.
Një dosje më e re përmbledh deklaratat e shtatë punonjësve federalë amerikanë, të cilët raportuan veçmas për “disa fenomene anomale të paidentifikuara” në Shtetet e Bashkuara gjatë vitit 2023. Në përshkrimin e dosjes thuhet se “Besueshmëria e raportuesve dhe natyra potencialisht anomale e vetë ngjarjeve e bëjnë këtë raport një nga më bindësit në arkivin aktual të AARO-s”, duke iu referuar Zyrës së Pentagonit për Zgjidhjen e Anomalive në të Gjitha Fushat (AARO).
Mes incidenteve të përshkruara në dokumente përfshihet një rast ku tri ekipe agjentësh federalë raportuan se panë “sfera portokalli në qiell që lëshonin ose nxirrnin sfera më të vogla të kuqe”. Një tjetër përshkrim tregon se dy agjentë federalë panë “një sferë të ndritshme portokalli… pranë një shkëmbi të lartë”. Ky i fundit shoqërohej me një vizatim të një rrethi portokalli-kuq me një vijë të verdhë në pjesën e poshtme. Objekti u krahasua në përshkrim me “Syrin e Sauronit nga ‘Lord of the Rings’, por pa beben e syrit”.
Materialet përfshijnë përshkrime dhe vëzhgime të raportuara si nga vëzhgues të kualifikuar në vitet 1947, ashtu edhe nga punonjës federalë në vitin 2023, dhe dokumentet evidentojnë shqetësimin dhe interesin e strukturave ushtarake dhe zyrtarëve për këto raportime pa ofruar konkluzione të njëzëshme mbi natyrën e fenomeneve. Source: Top Channel.
