Tensione të reja kanë shpërthyer në prapaskenat e Real Madridit. Sipas gazetës “SPORT”, figura të larta brenda klubit dyshojnë se Santiago Solari mund të jetë përgjegjës për rrjedhjen e informacioneve të ndjeshme te mediat. Përplasjet u shtuan pasi në publik dolën detaje rreth një ristrukturimi të mundshëm në hierarkinë drejtuese, përfshirë sugjerimet se Madridi po konsideronte ndryshime rrënjësore dhe emërimin e një Drejtori Sportiv brenda departamentit teknik. Kjo rrjedhje informacioni shkaktoi frustrim të madh në zyrat e klubit dhe detyroi reagimin publik të Real Madridit, i cili hodhi poshtë pretendimet duke i cilësuar “kategorikisht të rreme”.
Brenda klubit, gishti i dyshimit është drejtuar ndaj Solarit. Pozicioni i tij është bërë i paqartë muajt e fundit: ai mbetet i lidhur me klubin dhe shfaqet në ndeshje të rëndësishme, por nuk ka një rol të përcaktuar ditor përveç përgjegjësive si ambasador. Kjo pasiguri ka shkaktuar diskomfort në menaxhim. Raportohet se drejtuesit kanë konsideruar ndërprerjen përfundimtare të bashkëpunimit me ish-trajnerin, ndërsa Solari thuhet se ka kërkuar më shumë kohë derisa të gjejë një mundësi të re drejtimi diku tjetër.
Situata u tensionua edhe më tej për shkak të vendimeve të marrë më parë rreth stafit teknik. Solari ishte parë fillimisht si një opsion për të marrë përkohësisht drejtimin e ekipit në epokën “post-Xabi Alonso”, por klubi vendosi të besojë Alvaro Arbeloan, një zgjedhje që raportohet se ndikoi në qëndrimin e Solarit ndaj klubit. Në Real Madrid, vendimet kryesore sportive merren nga presidenti Florentino Perez së bashku me njerëzit e tij të besuar: Jose Angel Sanchez, Juni Calafat dhe trajneri i parë. Në strukturën e klubit, vënia në dyshim e këtij “rrethi të ngushtë” perceptohet si vëniedalja në dyshim e vetë Perezit.
Mbetet për t’u parë se cilat do të jenë hapat e ardhshëm të klubit në muajt në vijim, ndërkohë që presioni i brendshëm vazhdon të rritet.
