Në Bulqizë dështoi për herë të tretë zhvillimi i mbledhjes së Këshillit Bashkiak, për shkak të tensionesh politike dhe kundërshtimeve mes mazhorancës dhe opozitës. Mbledhja u ndërpre pasi pati mosdakordësi mbi rendin e ditës dhe refuzim të anëtarëve të opozitës për të marrë pjesë në votim. Që në nisje atmosfera ishte e tensionuar, me kundërshti të opozitës ndaj procedurave të ndjekura, duke pretenduar se disa pika nuk ishin trajtuar sipas rregullores së funksionimit të Këshillit Bashkiak.
Një nga temat qendrore ishte mocioni për shkarkimin e sekretarit të Këshillit Bashkiak, Klodian Reçi, i depozituar disa javë më parë me firmat e shtatë këshilltarëve të opozitës. Një prej firmëtarëve, këshilltari Mynir Sinani, më pas tërhoqi firmën, duke sjellë debate të reja ndërmjet palëve. Opozita insistoi se kërkesa për largimin e sekretarit mbetet e bazuar, duke e konsideruar atë si shkelje të rënda dhe tejkalim kompetencash.
Këshilltarët e djathtë ngritën shqetësime të lidhura me mënyrën e zhvillimit të dëgjesave publike për dhënien me qira të tokave pyjore dhe kullosore në territorin e bashkisë, duke akuzuar sekretarin se ka ushtruar kompetenca që sipas ligjit për pushtetin vendor dhe Këshillin Bashkiak nuk i takojnë këtij posti. Veap Halili kërkoi sqarime edhe për mungesën e përgjigjeve ndaj peticioneve të depozituara nga banorët e zonave të ndryshme të bashkisë. Ai përmendi veçanërisht peticionin e banorëve të Fushë-Bulqizës kundër ndërtimit të HEC-it “Zall Shytaj” dhe kërkesën e banorëve të Gjoricë për ndalimin e ndërtimit të një parku fotovoltaik.
Sipas Halilit, ka kaluar më shumë se një muaj nga depozitimi i këtyre kërkesave dhe ende nuk ka pasur përgjigje zyrtare nga institucionet përgjegjëse, pavarësisht se rregullorja e Këshillit Bashkiak parashikon afate konkrete për kthimin e përgjigjeve ndaj peticioneve qytetare. Ai akuzoi drejtuesit e mbledhjes për neglizhencë dhe mungesë transparence ndaj shqetësimeve të komunitetit.
Përplasjet verbale dhe ndërprerjet e vazhdueshme bënë të pamundur vijimin normal të seancës, dhe për shkak të mungesës së konsensusit drejtuesit e Këshillit vendosën shtyrjen e mbledhjes për të hënë. Dështimi i tretë pritet të thellojë përplasjet politike në institucionin vendor, ndërsa çështjet lidhur me projektet energjetike, pronat publike dhe funksionimin e administratës së këshillit mbeten pa zgjidhje konkrete.
