Dalin detaje të reja nga hetimet për eskortat që, së bashku me ato për botën arbitrare, kanë tronditur futbollin italian, raporton ‘La Repubblica’ e Milano. Në qendër të hetimeve është një agjenci eventesh në Milano, administratorët e së cilës ndodhen në arrest shtëpie me akuzat e shfrytëzimit dhe favorizimit të prostitucionit si dhe për bashkëpunim në krim.
Sipas Prokurorisë së Milanos, të paktën 70 futbollistë profesionistë kanë marrë pjesë në mbrëmjet e organizuara nga kjo agjenci. ‘La Repubblica’ përmend se në disa nga privatet ishte prezente edhe shishe vere me vlerë 20,000 euro. Megjithatë, asnjë prej futbollistëve nuk është nën hetim për momentin.
Mbrëmjet ofronin pako që përfshinin vendet e luksit në jetën e natës milaneze, eskortat dhe, në disa raste, edhe substanca narkotike që, sipas shënimit në material, nuk lënë gjurmë në rast të një kontrolli të mundshëm antidoping. Sipas artikullit, kjo praktikë vazhdoi edhe gjatë periudhës së pandemisë. Hetimet nisën pas një denoncimi të bërë nga një prej vajzave të reja të përfshira, i paraqitur në verën e 2024.
Avokati i Emanuele Buttini dhe Deborah Ronchi, Marco Martini, ka paraqitur në gjykatë dokumente me qëllim që të provojë mungesën e lidhjeve të klientëve të tij me prostitucionin dhe ka kërkuar anulimin e urdhërarrestit. Një prej dokumenteve është përgjimi mes dy bashkëpunëtorëve të agjencisë, ku flitet për detyrime nga tre futbollistë, përkatësisht nga Torino, Sassuolo dhe Verona. Sipas të dhënave të përmendura, lojtarët duhej të shlyenin një detyrim prej 3,400 eurosh, shifër që u konsiderua e pa-proporcionuar me faturën e një darke, duke lënë të kuptohet se pagesa lidhej me shërbime seksuale.
Menuja e mbrëmjeve përfshinte shishe vere prej 20,000 eurosh, tequila deri në 2,400 euro dhe një paketë të emërtuar “Italian mafia show” me shampanjë dhe vodka mbi 4,000 euro. Mbrojtja argumenton se të gjitha paratë e kërkuara ishin për pijet alkoolike dhe jo për vajzat, dhe se agjencia nuk ishte një aktivitet për të mbuluar shfrytëzimin e prostitucionit, krim që mbetet në qendër të hetimit.
