Autoriteti për Informimin mbi Dokumentet e ish‑Sigurimit të Shtetit (AIDSSH) i përcolli Prokurorisë së Përgjithshme, prokurorive të rretheve, drejtorive vendore të policisë, komisariateve, bashkive dhe institucioneve të tjera në Shkodër, Lezhë, Mirditë, Vlorë, Korçë, Kolonjë dhe Himarë kërkesat për vijimin e procedurave ligjore dhe hetimore lidhur me gjashtë vendvarrime të dyshuara të personave të zhdukur gjatë regjimit komunist, ku janë evidentuar të dhëna me probabilitet të lartë për praninë e mbetjeve mortore. Në dokumentacionin e dërguar, Autoriteti kërkon shqyrtimin juridik dhe autorizimin e veprimeve procedurale për kryerjen e gërmimeve dhe zhvarrimeve të kontrolluara për qëllime kërkimi, rikuperimi dhe identifikimi të mbetjeve, si dhe koordinimin ndërinstitucional për organizimin e ndërhyrjeve në terren.
Këto veprime pasojnë një proces disa‑vjeçar hetimi administrativ, mbledhjeje dëshmish nga familjarët dhe verifikimeve arkivore, si dhe ekspertizash jo‑invazive të realizuara në bashkëpunim me Komisionin Ndërkombëtar për Personat e Zhdukur (ICMP). Metodat, përfshirë përdorimin e radarëve dhe teknika antropologjike, kanë evidentuar me probabilitet të lartë praninë e mbetjeve mortore në disa nga vendet e dyshuara. AIDSSH deklaron se dokumentacioni i administruar përmban të dhëna të arsyeshme mbi praninë e mundshme të mbetjeve në këto vendvarrime.
Vendvarrimet e referuara përfshijnë: varrezat e Rrmajit në Shkodër, ku dyshohet se ndodhen eshtrat e Jup Kazazit, Sait Kazazit, Gjon Shllakut, Dom Luigj Zojzit dhe personave të tjerë të ekzekutuar gjatë viteve 1948–1953; zonën pranë ish‑burgut të Spaçit në Mirditë; zonën e Shpal pranë kishës, ku dyshohet se ndodhen organizatorët e Revoltës së Spaçit të vitit 1973 — Pal Zefi, Skënder Daja, Hajri Pashaj dhe Dervish Bejko; një vendvarrim i dyshuar në Mallkeq; vendvarrimi i dyshuar në Shënvasil, ku përmenden Hasan Hamza, Fiqiri Marika dhe Zyhdi Çitaku; dhe vendvarrimi i dyshuar në Shelegur, në malin e Gramozit, ku është lokalizuar vendi i dyshuar për mbetjet mortore të Dhimitër Konos.
AIDSSH thekson se për shumë familje kërkimi i të zhdukurve mbetet një plagë e hapur dhe synon, përmes autorizimit të gërmimeve, identifikimit me ADN dhe rikthimit të eshtrave, ndjekjen e praktikave ndërkombëtare për personat e zhdukur me forcë. Autoriteti nënvizon detyrimet ndërkombëtare për zbardhjen e fatit të të zhdukurve dhe trajtimin me dinjitet të mbetjeve mortore, dhe bëri thirrje që institucionet dhe qytetarët me informacion për vendvarrime të dyshuara të bashkëpunojnë në këtë proces, duke e cilësuar zbardhjen e fatit të të zhdukurve si një detyrim human, ligjor dhe moral.
