Kryeministri Edi Rama mori pjesë në EU4Municipalities II, programin strategjik për forcimin e pushtetit vendor dhe mbështetjen e rrugës së Shqipërisë drejt Bashkimit Europian. Ai e përshkroi projektin si një mjet për modernizimin e institucioneve vendore dhe për rritjen e kapaciteteve njerëzore, që sipas tij janë problemi më i mprehtë i kësaj kohe dhe i ardhshëm nëse nuk adresohen tani.
Rama theksoi se anëtarësimi në familjen europiane përbën si bekim, ashtu edhe sfidë për Shqipërinë, veçanërisht në nivelin vendor, duke theksuar se konsolidimi i qeverisjes vendore është pjesë e pandarë të funksionimit dhe përmirësimit të marrëdhënieve me BE-në. Ai shtoi se një sfidë e konsiderueshme për vendet anëtare është aftësia për të thithur mbështetjen e BE-së përmes dijes se si ta bëjnë këtë, dhe në këtë pikë programi EU4Municipalities II është kyç.
Rama vuri në dukje se 11 milionë eurot e para nuk janë thjesht një shumë, por se rëndësi ka instrumenti dhe mënyra si është ndërtuar programi, që do t’i bëjë bashkitë më të angazhuara për të pasur akses në këtë instrument. Ai shprehu besim se me mbështetjen e aktorëve të përfshirë dhe të miqve të GIZ-it, që ofrojnë jo vetëm mbështetje financiare por edhe një burim dijesh, si dhe me angazhimin e ministrit të Pushtetit Vendor, mund të arrihet maksimumi i mundshëm për bashkitë.
Kryeministri përmendi gjithashtu dobësinë e dixhitalizimit në nivel vendor, duke theksuar një diferencë të papranueshme midis peshës që ka dixhitalizimi në shërbimin qendror dhe atij vendor. Ai u shpreh se do të diskutojë çështjen me ministrin, me BE-në dhe me partnerët gjermanë, duke vënë në dukje në formë shaka se disa institucione gjermane punojnë ende me fax. Rama porositi kryebashkiakët që ta shohin programin si mundësi për të shfrytëzuar kapitalin njerëzor në funksion të projekteve nga BE.
