Në mbledhjen e së premtes, Bordi i Transparencës ndryshoi përsëri çmimet e karburantit. Nga 196 lekë të mëparshme, çmimi maksimal i shitjes me pakicë për nënproduktin gazoil u vendos të mos jetë më shumë se 193 lekë për litër, ndërsa çmimi i shitjes me shumicë jo më shumë se 181 lekë për litër. Për benzinën, Bordi vendosi që çmimi maksimal i shitjes me pakicë të mos kalojë 179 lekë për litër, dhe ai i shitjes me shumicë jo më shumë se 167 lekë për litër.
Bordi, në mbledhjen e datës 8 maj 2026, sqaroi se çmimi i shitjes me pakicë për gazoilin e standardit SSH EN 590 është jo më shumë se 193 lekë/litër, ndërsa çmimi i shitjes me shumicë jo më shumë se 181 lekë/litër. Për benzinën u përcaktua çmimi i shitjes me pakicë jo më shumë se 179 lekë/litër dhe ai i shitjes me shumicë jo më shumë se 167 lekë/litër. Vendimet e Bordit hyjnë në fuqi sot, data 8, ora 13:30, dhe do të jenë të vlefshme deri në mbledhjen e ardhshme, ku do të pasqyrohen ndryshimet e reja të çmimeve të shitjes.
Bordi tërhoqi vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtij vendimi. Në rast të shkeljeve të konstatuara, parashikohet vendosja e pezullimit të aktivitetit për operatorët përkatës. Ministria e Ekonomisë dhe Inovacionit, së bashku me Ministrinë e Financave dhe Ministrinë e Infrastrukturës dhe Energjisë, u angazhuan për të mbrojtur interesat e konsumatorëve shqiptarë dhe për ruajtjen e parimeve të konkurrencës së ndershme në treg.
Sqarim: Referuar Aktit Normativ nr. 1, datë 3.4.2026, parashikohet se në rast se çmimi i shitjes me pakicë për gazoilin është më i lartë se 220 lekë/litër ose për benzinën më i lartë se 200 lekë/litër, zbatohet niveli 80% i akcizës. Bazuar në metodologjinë e llogaritjes së çmimeve tavan, çmimet e vendosura nga Bordi janë nën këto kufij, prandaj niveli i akcizës do të zbatohet në masën 100%.
