Në kushtet kur kujtimet e Covid-19 janë ende të freskëta, përhapja e hantavirusit në javët e fundit ka shkaktuar panik në popull, ndërsa mungesa e informacionit ka shtuar shqetësimet. Frika e një pandemie të re, përveç luftës, është në ajër, por Organizata Botërore e Shëndetësisë (OBSH) bën thirrje që të mos ketë panik. Në një njoftim për mediat, i publikuar së fundmi, OBSH bën me dije se kjo nuk është një tjetër pandemi si e Covid-it.
OBSH-ja shpjegon se hantaviruset përhapen “shumë, shumë ndryshe” dhe zakonisht përmes kontaktit të zgjatur, çka i bën të ndryshme nga mënyra e përhapjes së Covid-19. Nga tetë rastet e dyshuara, pesë janë konfirmuar dhe të tetë personat ishin në bord të anijes. Duke pasur parasysh periudhën e inkubacionit, e cila mund të jetë deri në gjashtë javë, mund të shfaqen raste të tjera në ditët apo javët në vijim.
Sipas OBSH-së, rreziku për shëndetin publik vlerësohet i ulët. Po këtë vlerësim jep Drejtori i Përgjithshëm i OBSH-së edhe lidhur me situatën në Ishujt Kanarie, ku anija po lundron aktualisht. OBSH-ja nënvizon gjithashtu se çifti i parë i infektuar kishte vizituar vende “ku ishte e pranishme specia e miut që dihet se mbart virusin”, duke lidhur kështu zbulimet fillestare të hetimeve epidemiologjike me mundësinë e kontaktit me burimin e infeksionit.
Hetimet për shpërthimin janë “ende në vazhdim”, thekson OBSH-ja, dhe informacionet shtesë do të vijnë pas përfundimit të tyre. Njoftimi i organizatës synon të qetësojë publikun duke sqaruar dallimet në mënyrën e transmetimit të hantavirusit krahasuar me Covid-19 dhe duke dhënë vlerësimin aktual të rrezikut si të ulët. (Top Channel)
