Ish-kreu i Krimeve të Rënda, Eugen Beci, deklaroi në Top Story se në këtë proces gjyqësor nuk janë respektuar asnjë nga nenet e Konventës Europiane të të Drejtave të Njeriut. Ai e konsideron ndryshimin në nenin 162 të Kushtetutës së Kosovës si “çudia më e madhe” që mund t’i ndodhë një vendi, duke shtuar se kjo sjell rrëzimin e të drejtave të njeriut dhe të drejtës për një proces të rregullt ligjor, pasi ky ndryshim, sipas tij, është sanksionuar në Kushtetutë.
Beci ngriti pyetjen nëse ky është një proces i rregullt ligjor, duke u kthyer edhe në shembullin e gjyqit të Nurenbergut, dhe theksoi problemin e sovranitetit në ndërtimin e gjykatës me “tre shtylla”. Ai përmendi marrëveshjen mes Kosovës dhe Evropës të vitit 2014 dhe theksoi mungesën e fondeve dhe personelit nga Kosova si dhe mos-përdorimin e flamurit të Kosovës, çka, sipas tij, lind dyshime nëse sistemi gjyqësor është i Kosovës apo i ndërkombëtarëve.
Një nga kritikat kryesore që Beci përmendi është selektiviteti në ndjekjen penale: “Kritikat më të forta janë që këtu po gjykohen vetëm luftëtarët e UÇK. A kemi një pjesë tjetër të luftës për krimet që kanë bërë serbët? Zero.” Ai tha se duhet të flitet edhe për krimet e serbëve.
Pala mbrojtëse, sipas Becit, ngre dyshime mbi ligjin e kohës që duhet të aplikohet — ligji i vitit ’99 apo ai aktual. Ai vuri në dukje se duhet të zbatohet çdo nen i KEDNJ, veçanërisht neni 5 që flet për afatet e paraburgimit, dhe pretendoi se në këtë gjykatë këto janë shkelur nga fillimi në fund, duke përmendur 5–6 vite paraburgim pa proces gjyqësor.
Për procesin e rregullt ligjor, Beci theksoi se i akuzuari duhet të dijë se kush janë dëshmitarët kundër tij, ndërsa në këtë rast shumica janë anonimë. “Ne nuk po mbrojmë dëshmitarët, por procesin e rregullt ligjor. Deklarimet e dëshmitarit redaktohen”, u shpreh ai.
