Belinda Ballukut pritet t’i arrestohen edhe dy “ushtarët” e saj. Burime nga SPAK bëjnë me dije për portalin Timoni.al se pritet që shumë shpejt të ketë zhvillime të rëndësishme në disa prej dosjeve të bujshme të tenderave publikë, ku përmenden emra të lidhur me Belinda Balluku.
Sipas këtyre burimeve, në fokus të hetimeve janë Ergys Verdho, ish-drejtor i ARRSH-së, dhe Gentian Gjyli, drejtori aktual i rrugëve. Të njëjtat burime pretendojnë se ndaj tyre janë mbledhur prova për shkelje dhe abuzime në procedurat e prokurimeve publike.
Në njërën anë, ish-drejtuesi i Autoriteti Rrugor Shqiptar, Ergys Verdho, përmendet në disa procedura të debatueshme, ku spikat tenderi i vitit 2020 për mirëmbajtjen e akseve rrugore me fond limit 164.3 milionë lekë. Ky tender u fitua nga kompania “4A-M” me ofertë sa 97.95% e fondit limit – një nivel që ka ngritur dyshime serioze për mungesë gare dhe paracaktim të fituesit.
Pas kësaj kompanie është përmendur biznesmeni Ardit Metaliaj, ndërsa në sfond janë aluduar lidhje me Bashkim Ulaj. Vetëm në tetë vitet e fundit, kjo kompani raportohet të ketë përfituar rreth 57 milionë euro nga buxheti i shtetit.
Një tjetër çështje e rëndë është ajo e paneleve diellore në Digën e Zadejës, me vlerë 8.13 milionë euro, për të cilën Gazment Bardhi ka depozituar kallëzim në SPAK. Në këtë rast përfshihen edhe Belinda Balluku dhe Ergys Verdho. Sipas të dhënave, një MWp është kontraktuar me 985 mijë euro, ndërkohë që në tregun privat i njëjti kapacitet realizohet për rreth 365 mijë euro, duke ngritur dyshime për një dëm prej miliona eurosh ndaj buxhetit të shtetit.
Kontrasti bëhet edhe më i fortë kur krahasohet me një tender të vetë SPAK, ku kostoja për instalim rezulton rreth 444 euro për kWp – më shumë se dyfish më e ulët.
Në krahun tjetër, zhvillime konkrete ka për kreun aktual të ARRSH-së, Gentian Gjyli. Ai është marrë i pandehur nga SPAK për çështjen e tenderit të tunelit të Llogarasë, një nga projektet më të mëdha infrastrukturore në vend. Për të njëjtën çështje është marrë e pandehur edhe ish-zëvendëskryeministrja Belinda Balluku.
