Politikanë nga e majta dhe e djathta i dhanë lamtumirën e fundit Servet Pëllumbit, të përshkruar në ceremoni si profesor i socialistëve, ish-kryetar i Kuvendit dhe themelues i PS-së. Në ceremoninë e përcjelljes u vendosën kurora nga bashkëpuntorët e tij më të ngushtë, përfshirë Gramoz Ruçin, Namik Doklen, Artë Daden dhe Arben Malajn, si dhe nga grupi parlamentar socialist i sotëm. Kundërshtarë politikë në sallën e Parlamentit, midis të cilëve ish-Presidenti Bamir Topi, Genc Ruli dhe Fatmir Mediu, gjithashtu morën pjesë dhe vendosën kurora. Të pranishëm ishin Presidenti Bajram Begaj, kryetari i Kuvendit Niko Peleshi, kryeministri Edi Rama dhe nga demokratët nënkryetari i Kuvendit Agron Gjekmarkaj.
Servet Pëllumbi ka lindur në Korçë dhe pas ndryshimeve politike në vitet ’90 ka kandiduar në këtë zonë elektorale. Ai ka kryer studimet e larta në Universitetin e Petersburgut, ku mori titullin doktor i shkencave në Letërsi. Karrierën pedagogjike e nisi midis viteve 1960 dhe 1963 si pedagog në Institutin Pedagogjik të Korçës dhe vazhdoi në këtë profesion deri në vitin 1977. Në vitin 1977 u zgjodh anëtar i Komitetit Drejtues të Partisë së Punës, ndërsa për rreth tre vjet ka qenë pedagog në Universitetin e Tiranës.
Pas ndryshimeve demokratike të vitit 1990, Pëllumbi u pozicionua në postin e nënkryetarit të Partisë Socialiste, një detyrë që mbajti deri në vitin 1996. Gjatë kësaj periudhe ai udhëhoqi fushata të rëndësishme politike të socialistëve, duke përfshirë kundërshtimin e referendumit për Kushtetutën dhe më pas fushatën për lirimin e Fatos Nanos nga burgu.
Pëllumbi njihej si një nga deputetët më jetëgjatë të Kuvendit të Shqipërisë, me pjesëmarrje aktive në komisione të ndryshme parlamentare. Ceremonia e përcjelljes grumbulloi figura të ndryshme të skenës politike, duke reflekutuar për pjesëmarrjen e gjerë të përfaqësuesve të spektrit politik në nderimin e karrierës së tij.
