Kryetari i Lidhjes Demokratike të Kosovës, Lumir Abdixhiku, njoftoi se është dakordësuar për garim të përbashkët me Vjosa Osmanin në zgjedhjet parlamentare të 7 qershorit. Deklarata u dha pas mbledhjes së Kryesisë së LDK-së dhe kryetarëve të degëve, ku u diskutuan përgatitjet për zgjedhjet e parakohshme.
Abdixhiku tha se LDK-ja do ta thërrasë këtë të shtunë Këshillin e Përgjshëm të partisë, ku pritet të formalizohen vendimet lidhur me procesin zgjedhor dhe marrëveshjen për garim të përbashkët. Ai theksoi se u dakordësuan të thërrasin Këshillin e Përgjithshëm “për t’i finalizuar të gjitha çështjet që lidhen me pjesën përgatitore zgjedhore”.
Një prej temave kryesore të mbledhjes, sipas tij, ishte ajo që e quajti “bashkimi i madh”, për të cilin LDK-ja është angazhuar kohët e fundit. Abdixhiku deklaroi se pjesëmarrësit janë informuar për procesin e deritanishëm të diskutimeve dhe se ka patur dakordim për ta çuar përpara idenë e garimit të përbashkët me Osmanin. “Votuam dhe u dakordësuam që të formalizojmë tani e tutje, në bashkëpunim me Vjosa Osmanin, garimin e përbashkët në zgjedhjet e ardhshme”, tha ai.
Ai gjithashtu theksoi se diskutimet me Osmanin ende duhet të finalizohen para se marrëveshja të marrë formën përfundimtare në organet e LDK-së. Abdixhiku kërkoi disa ditë për të përfunduar bisedimet me Osmani dhe për të arritur një votim formal në mbledhjen e Këshillit të Përgjithshëm.
