Gjykata e Shkallës së Parë të Juridiksionit të Përgjithshëm Fier zhvilloi analizën vjetore për vitin 2025. Në takim morën pjesë Kryetari i Gjykatës Noel Veizi, Inspektori i Këshillit të Lartë të Drejtësisë Artur Metani, anëtarët e KLGJ-së Emona Muçi e Bledar Bajri, Kryeprokurori Elion Mustafaj, përfaqësues të Drejtorisë Vendore të Policisë si dhe aktorë të tjerë të sistemit.
Kryetari i gjykatës Noel Veizi vlerësoi se viti 2025 ka qenë sfidues për shkak të mungesës së organikës dhe ambienteve të pamjaftueshme të gjykatës. Aktiviteti gjyqësor zhvillohet për një territor që përfshin gjashtë bashki dhe një popullsi prej 240 377 banorësh. Gjatë vitit u regjistrua një rritje e çështjeve të gjykimit të veprave penale me 71.5% krahasuar me periudha të mëparshme, ndërsa dhuna në familje shënoi rritjen më të shqetësuese duke arritur treguesit më problematikë të pesëvjeçarit të fundit. U evidentua gjithashtu një numër i lartë çështjesh të mbartura.
Problematikë e përsëritur gjatë analizës ishte mungesa e ambienteve të përshtatshme, përfshirë sallat e gjyqit dhe ambientet e konsultimit. Kjo situatë riktheu debatin për nevojën për gjetjen, prej 15 vitesh, të një sheshi për ndërtimin e një gjykate të re. Kryetari i Dhomës së Avokatisë Fier, Ermal Hamataj, theksoi se kjo çështje duhet të zgjidhet sa më parë.
Statistikat e vitit 2025 treguan se numri total i çështjeve për gjykim ishte 10 764, ndërsa numri i veprave të gjykuara arriti në 5 677. Gjatë vitit u dënuan 971 shtetas, nga të cilët 17 ishin të mitur. Takimi përfshiu diskutime mbi këto tregues dhe problematikat infrastrukturore dhe organizative që ndikojnë në punën e gjykatës.
