Egnatia njoftoi zyrtarisht ndarjen me trajnerin Edlir Tetova, teknikun që drejtoi skuadrën për afërsisht tre vjet e gjysmë dhe e bëri kampione të padiskutueshme të futbollit shqiptar. Klubi deklaroi se shkaku kryesor i vendimit është gjendja shëndetësore dhe stresi i vazhdueshëm i trajnerit, duke e falënderuar Tetovën për kontributin e dhënë gjatë ghatë periudhës në krye të skuadrës.
Gjatë mandatit të Tetovës, Egnatia arriti rezultate të rëndësishme: dy tituj kampioni në Abissnet Superiore, një pjesëmarrje historike në kompeticionet europiane dhe një total prej pesë trofesh. Sipas klubit, ai transformoi Egnatian nga një sfidues në një skuadër dominante në elitën e futbollit shqiptar, duke ndërtuar një trashëgimi të theksuar në periudhën që drejtoi rrogozhinasit.
Mediat mësojnë se pas largimit të Tetovës, në stolin e kampionëve pritet të emërohet Nevil Dede, me zyrtarizimin që pritet të bëhet realitet në orët e mbrëmjes. Dede, 51 vjeç, cilësohet si një nga trajnerët me eksperiencë më të pasur në futbollin shqiptar dhe është kandidat kryesor për të marrë drejtimin e skuadrës kampione.
Karriera e Dedes përfshin drejtimin e disa klubeve të Abissnet Superiores. Ai ka drejtuar AF Elbasanin, me të cilin fitoi Kategorinë e Parë dhe sigurimin e ngjitjes, dhe ka qenë në krye të Bylisit, ku u emërua në shtator 2024 pas largimit të Emanuel Egbos. Aventura e tij më e fundit ishte te Ferizaj në Superligën e Kosovës, ku drejtoi për gjashtë muaj e gjysmë — 25 ndeshje me bilanc prej 10 fitore, 6 barazime dhe 9 humbje — përpara se klubi të ndërpriste bashkëpunimin më 19 prill.
Nëse emërimi i Dedes zyrtarizohet, ai do të marrë përsipër misionin e mbrojtjes së titullit kampion dhe vazhdimin e pjesëmarrjes së Egnatias në garat europiane, detyra që mediat paraqesin si një nga më të rëndësishmet në karrierën e tij.
