Sali Berisha deklaroi se, pas përjashtimeve të kandidaturave, ai është i vetmi kandidat brenda Partisë Demokratike për kryetar. Ai theksoi se nuk mund të garojnë për kreun e partisë ata që, sipas tij, e kanë tradhtuar PD-në duke bashkëpunuar me kundërshtarët politikë ose duke vepruar kundër interesave të partisë gjatë fushatave elektorale. Berisha vuri theksin te rëndësia e dëmtimit të besimit të brendshëm: “Këta në çdo parti politike në botë, këta përjashtohen për tradhtinë që kanë bërë ndaj partisë së tyre në moment beteje.”
Në fjalimin e tij ai mbrojti edhe siç e quajti procesin zgjedhor në PD-në, duke thënë se “PD ka garën më demokratike dhe të ndershme.” Krahas kësaj ai bëri një krahasim të përgjithshëm me praktikat në parti të tjera, duke pohuar se në familjet politike të vendit, shumica e kryetarëve nuk zgjidhen drejtpërdrejt nga anëtarësia, por emërohen nga Kryesia: “Kryetarët e partive në familjet tona si motra, vetëm një pjesë e vogël zgjidhen nga anëtarësia, të tjerët i zgjedh Kryesia.”
Berisha garantoi se Partia Demokratike pranon dhe do të pranojë çdo demokrat që plotëson kriteret për të marrë pjesë në garë, duke e cilësuar këtë proces si “gara më e rëndësishme e partisë” dhe duke theksuar se ai duhet të përfaqësojë anëtarësinë. Sipas tij, kushti themelor për kandidim është përmbushja e kritereve të përcaktuara dhe respekti për besnikërinë ndaj partisë në momentet vendimtare.
Ai ngriti pyetje retorike për përfshirjen e disa kategorive kandidatësh, duke përmendur në mënyrë të veçantë ata që ai i konsideron si kandidatë të Ramës, ata që punuan hapur kundër PD-së gjatë fushatave elektorale, si dhe ata që ndërprenë fushatën për të kaluar në parti të tjera: “Në garë të marrin pjesë kandidatë të Ramës? Apo kandidatë që në fushatë elektorale punuan haptas kundër PD? Apo kandidatë që në fushatë kaluan në parti tjetër?” Ai përfundoi se është jashtë logjikës që të imagjinohet mundësia që të tilla figura të kandidojnë dhe riafirmoi nevojën për përmbushjen e kritereve për kandidim.
