Një çift britanik i arrestuar në Iran ka rrëfyer për herë të parë për mediat kushtet në burgun Evin, ku po vuajnë një dënim të rëndë për akuza që i mohojnë. Lindsay Foreman, 53 vjeç, dhe bashkëshorti i saj Craig Foreman, 52 vjeç, u arrestuan në janar 2025 gjatë një udhëtimi me motor rreth botës, nën dyshimet për spiunazh, dhe janë dënuar me 10 vite burg, një vendim që e konsiderojnë të padrejtë.
Në një intervistë telefonike nga burgu, Lindsay thotë se përpiqet të ruajë qetësinë duke lexuar, duke bërë ushtrime dhe joga, por pas 16 muajsh në paraburgim pranon se situata është bërë e rëndë: “Po përballem me realitetin se mund të qëndrojmë këtu për një kohë shumë të gjatë.” Craig deklaron se ndihen të pafajshëm dhe e përjeton vuajtjen si humbje të jetës: “Ndjej se po e shpërdorojmë jetën dhe po kalbemi këtu. Ne jemi të pafajshëm”. Ai i bën thirrje qeverisë britanike të veprojë: “Veproni, flisni, na nxirrni nga këtu. Ndihemi si pre e lehtë”.
Çifti mbahet në qeli të ndara brenda të njëjtit burg dhe komunikon rrallë me familjen. Djali i Lindsay, Joe Bennett, merr telefonata të rregullta nga prindërit, por bisedat janë shpesh të vështira, ndërpriten dhe monitorohen; një mesazh në persisht ndërpret thirrjet për t’i paralajmëruar se thirrja vjen nga burgu.
Gjatë tensioneve ushtarake të fundit në Iran, çifti thotë se përjetoi frikë të madhe; një shpërthim i afërt shkaktoi thyerje dritaresh të burgut ndërsa Lindsay ishte në telefon me të birin. Kushtet e përshkruara përfshijnë mungesë të higjienës dhe kujdesit shëndetësor, si dhe dhunë mes të burgosurve: “Ka përleshje dhe armë të improvizuara. Duhet të qëndrosh larg problemeve,” thotë Craig. Ai ndan qelinë me të burgosur të huaj dhe thotë se ka krijuar solidaritet, ndërsa Lindsay është më e izoluara pa bashkëqytetarë që flasin anglisht.
Çifti kishte nisur udhëtimin me motor nga Evropa drejt Australisë dhe kishte hyrë në Iran nga Armenia, duke planifikuar të qëndronte vetëm disa ditë. Lindsay, që po zhvillonte një studim mbi “çfarë përbën një jetë të mirë”, thotë se pyetjet e tyre mund të kenë ngjallur dyshime tek autoritetet. Ata rrëfejnë gjithashtu se kanë qenë dëshmitarë të rasteve kur disa të burgosur janë marrë për ekzekutim dhe lajmet janë bërë publike më pas. Lindsay thekson se shumë iranianë përballen me kushte edhe më të rënda dhe dënime me vdekje për pjesëmarrje në protesta: “Për ne do të ketë fund një ditë. Por për disa prej këtyre njerëzve, jo.”
