Operacioni ndërkombëtar i udhëhequr nga prokuroria e Salzburgut në Austri dhe SPAK në Shqipëri ka shkatërruar një rrjet kriminal të Call Center-ave në Tiranë, i cili dyshohet se ka përfituar mbi 50 milionë euro duke mashtruar qytetarët evropianë. Në qendër të skemës ishte përdorimi i imazheve dhe videove të manipuluara për të joshur viktimat, përfshirë përdorimin e figurës së futbollistit David Alaba.
Mashtrimi shfrytëzoi identitete të personazheve publike për të dhënë besueshmëri investimesh të rreme. Në materiale të manipuluara u përdorën figura si Presidenti Federal Alexander Van der Bellen dhe prezantuesit e ORF Armin Wolf dhe Nadja Bernhard; në një rast, Presidenti duket duke garantuar investimin dhe duke thënë në video: “Mos humbni kohë, veproni tani”. U promovuan premtime fitimi të jashtëzakonshëm, përfshirë një pagesë mujore prej 250,000 eurosh kundrejt një shume fillestare prej vetëm 250 eurosh.
Përveç Van der Bellen dhe prezantuesve të ORF, në regjistrime të manipuluara (deepfake) u shfaqën edhe emra të tjerë të njohur si ish-Kancelari Federal Karl Nehammer, futbollisti David Alaba, ish-ylli i skive Hermann Maier, prezantuesit Armin Assinger dhe Mirjam Weichselbraun, si dhe artisti i kabaresë dhe prezantuesi Christoph Grissemann. Hetuesi Völkel vuri në dukje se këto falsifikime nuk janë perfekte, por prapë mjaftuese që njerëzit të besojnë dhe të depozitojnë para në platforma të tilla.
Kriminelët përdorën teknologjinë e inteligjencës artificiale për të krijuar video ku Alaba, ndër të tjera, duket sikur i bën thirrje ndjekësve të investonin në platforma si “Lion-Trade”. Duke shfrytëzuar popullaritetin dhe besueshmërinë e figurave të njohura, Call Center-at në Tiranë arrinin të zhvatnin shumave që shkojnë deri në miliona euro nga kursimet e qytetarëve.
Operacioni, i mbështetur nga Europol, ka çuar në arrestimin e dhjetëra personave në Shqipëri. Hetimet vazhdojnë për të përcaktuar nëse emra të tjerë të botës së sportit janë përfshirë pa dëshirën e tyre në këtë skemë kriminale.
