Pas mbledhjes së qeverisë, ministrja e Arsimit Mirela Kumbaro njoftoi miratimin e aktit të 12 nënligjor në zbatim të ligjit për shkencën në Republikën e Shqipërisë, si pjesë të detyrimeve ligjore për kapitullin e kërkimit shkencor. Ajo e vlerësoi këtë akt si një hap të rëndësishëm për organizimin e institucioneve dhe zhvillimin e kërkimit shkencor, duke e përafruar legjislacionin shqiptar me direktivat dhe rregulloret e Bashkimit Evropian dhe të Komisionit Europian. Kumbaro tha se me miratimin e këtij nënligji është kryer veprimi i fundit ligjor për detyrimet lidhur me kapitullin e kërkimit shkencor dhe shprehu shpresën që kapitujt e kërkimit dhe arsimit të jenë nga të parët që do të mbyllen në procesin e negociatave brenda këtij viti. Ajo theksoi gjithashtu bashkëpunimin e ngushtë me institucionet shqiptare dhe BE-në për të siguruar përputhshmërinë e plotë dhe për të hapur mundësi për kërkuesit shkencorë që të krijojnë njësi kërkimore në sektorë të ndryshëm, me të drejta të ngjashme me vendet e BE-së.
Ministrja përmendi një kriter tjetër, atë të rritjes së investimit për kërkimin shkencor, duke theksuar se investimi buxhetor është trefishuar që nga viti 2022. Sipas saj, janë marrë vlerësime nga BE-ja për përparimin në këtë fushë dhe pritet që kapitujt që lidhen me arsimin të avancojnë në procesin e negociatave.
Në përgjigje të pyetjes për projektin “after school” dhe nëse shkollat tona plotësojnë kushtet, Kumbaro deklaroi se projektet passhkollore ekzistojnë prej rreth dhjetë vjetësh në forma të ndryshme dhe me emërtime të ndryshme, përfshirë edhe shkollat qendër komunitare. Ato përfshijnë paketën e aktiviteteve që shoqëron jetën edukative të nxënësve, si olimpiadat që do të shtohen vitin e ardhshëm dhe festivalin kombëtar të shkencës që u fut këtë vit. Janë shtuar iniciativa si “ferma në shkolla” dhe orët e edukimit mjedisor, si brenda mjediseve shkollore ashtu edhe në bashkitë e vogla. Ministria ka ristrukturuar këtë tipologji aktivitetesh, i ka dhënë formë ligjore dhe ka dyfishuar shpërblimin për mësuesit që angazhohen jashtë orarit. Për furnizimin me ushqim është nisur bashkëpunimi me Bashkinë e Tiranës, ndërsa zgjerimi i përgjegjësive dhe përgatitja e infrastrukturës ligjore e fizike do të avanconin më tej, po ashtu siç është planifikuar për sportet.
