Përplasja mes Elon Musk dhe Sam Altman hyri në fazën vendimtare me fillimin e një gjyqi federal në Kaliforni që pritet të zgjasë një muaj. Musk akuzon Altman dhe drejtuesit e OpenAI për mashtrim financiare dhe për braktisjen e misionit fillestar jofitimprurës të organizatës, duke kërkuar rreth 150 miliardë dollarë dëmshpërblim dhe ndryshime rrënjësore në drejtimin e kompanisë. OpenAI i mohon akuzat, duke pretenduar se Musk vepron nga rivaliteti dhe kërkon të dëmtojë një konkurrent të rëndësishëm në fushën e inteligjencës artificiale.
Padia e Musk përfshin edhe bashkëthemeluesin e OpenAI, Greg Brockman, si dhe Microsoft, që akuzohet për mbështetje në transformimin e OpenAI drejt një modeli fitimprurës; Microsoft e ka mohuar këtë pretendim. Gjyqi vjen pas një historie të gjatë konflikti: OpenAI u themelua në 2015 nga Musk dhe Altman si organizatë jofitimprurëse për të zhvilluar inteligjencën artificiale në shërbim të njerëzimit, por mosmarrëveshjet për drejtimin çuan në largimin e Musk në 2018.
Tensionet u rritën pas suksesit të ChatGPT në 2022, që shënoi një zgjerim të përdorimit të teknologjisë nga publiku. Musk, themelues i xAI, pretendon se OpenAI tashmë i shërben interesave komerciale, veçanërisht Microsoft. Në 2024 ai ngriti padi, duke thënë se kishte investuar rreth 40 milionë dollarë dhe ishte mashtruar. Një vit më pas, Musk dhe një grup investitorësh ofruan të blinin asetet e OpenAI për 97.4 miliardë dollarë, ofertë që u refuzua.
Ekspertët e përshkruajnë procesin si një “përplasje titanësh”, me dëshmi të pritshme nga figura kryesore të industrisë, përfshirë CEO-n e Microsoft, Satya Nadella, si dhe ish-drejtues dhe shkencëtarë të OpenAI. Çështja po shqyrtohet nga një juri me nëntë anëtarë nën mbikëqyrjen e gjyqtares Yvonne Gonzalez Rogers, e cila ka theksuar se statusi dhe pasuria e palëve nuk do të ndikojnë në vendim.
Analistët vënë në dukje se rezultati i procesit mund të ketë pasoja të gjera për industrinë globale të inteligjencës artificiale: një fitore e Musk mund të dobësonte një prej aktorëve kryesorë të tregut, ndërsa një vendim në favor të OpenAI do të forconte drejtimin aktual të zhvillimit të teknologjisë.
