Ish-Presidenti Ilir Meta publikoi intervistën e dhënë në emisionin “Breaking” në Top News me gazetaren Dafina Hysi, duke folur për gjendjen e tij shëndetësore, kushtet në qeli dhe zhvillimet rreth procesit gjyqësor. Ai deklaroi se është “më mirë se kurrë” fizikisht, mendërisht dhe shëndetësisht, pavarësisht kufizimeve publike. Sqaroi se, që nga 2 korriku 2025, ndryshe nga të paraburgosurit e tjerë, i lejohet vetëm një herë në ditë ajrosje; mohoi pretendimin se bën ajrosje dy herë, dhe vuri në dukje se ambientet e ajrosjes, dhomat e takimeve dhe korridoret janë të survejuara 24 orë me kamera. Meta tha se trupi i qelisë shërben edhe si palestër me mjete rrethanore, se ushtrimet i marrin rreth katër orë në ditë dhe se dieta e tij është e shëndetshme falë përkujdesjes së motrës së tij. Përsa i përket pamjes, ai hodhi poshtë idenë se trupi i tij duket i hollë për shkak të mungesës së ushqimit, dhe përproblemet e flokëve apo lëkurës përmendi mungesën e berberit profesionist dhe ujin e klorinuar, duke ironizuar se një javë në lumenjtë e Valbonës ose Shalës do t’i ndihmonte lëkurën.
Meta kritikoi IEPV “Jordan Misja” dhe e quajti “gënjeshtër të trashë” deklaratën që e paraqiste duke bërë ajrosje dy herë në ditë, si dhe përmendi se që nga 2 korriku vazhdojnë shumë kufizime, përveç ping-pongut që u hoq si “sanksion” një muaj më parë. Ai sulmoi edhe vendimet e GJKKO-së, duke akuzuar gjykatën për vendosjen si “standard” të trajtimit të rastit të një terroristi maroken në Francë, dhe e konsideroi si një turp të “Ramaformës”. Meta tha se procesi nuk mund të jetë i barabartë kur nuk dëgjohet mirë, nuk konsultohet me avokatin dhe përmendi përdorimin denigrues të “kafazit”, referuar edhe deklaratës së Komitetit Shqiptar të Helsinkit.
Si skandal të dytë ai përmendi vendimin për të penguar transmetimin live të tërë procesit kur çështja është me interes publik, duke kërkuar që qytetarët të dëgjojnë vetë akuzat dhe provat e SPAK-ut dhe mbrojtjen e tij. Meta tha se transparenca nuk mund të pranohet si pengesë nga pretendimet se do të ndikohen dëshmitarët, pasi dëshmitë janë dhënë nën përgjegjësi penale dhe disa prej tyre mund të publikohen. Ai akuzoi Edi Ramën si “kallëzues të rremë, prokuror militant e falsifikues” dhe kritikoi ndikimin e tij në proces.
