Një ditë më parë u arrestua në Brazil Ervin Mata, i akuzuar nga drejtësia shqiptare për trafikimin ndërkombëtar të drogës. Gazetarja Anila Hoxha në emisionin “Shqipëria Live” shpjegoi procedurat e mundshme të ekstradimit dhe hapat që pritet të ndërmerren.
Sipas Hoxhës, fillimisht do të veprojë SPAK-u, pasi Prokuroria e Posaçme e ka shpallur në kërkim Ervin Matën për trafikimin e kokainës në Europë. Një element kyç në proces është marrëveshja e ekstradimit midis Shqipërisë dhe Brazilit; nëse ekziston, ajo do të lehtësojë procedurat, në të kundërtën do të kërkohen mekanizma të tjerë bashkëpunimi.
Brazili do të kontrollojë kartelën e Ervin Matës për të vlerësuar nëse ky shtetas ka probleme ligjore në vendin pritës. Në rast se Brazili ka çështje penale të hapura ndaj tij, autoritetet braziliane do të vendosin fillimisht nëse Mata do të përballet me drejtësinë atje dhe më pas nëse do të procedohet ekstradimi drejt Shqipërisë. Nga ana tjetër, nëse nuk ka pengesa nga sistemi gjyqësor brazilian, do të mund të ndiqet rruga e ekstradimit drejt vendit kërkues.
Hoxha theksoi se është SPAK që nisin zyrtarisht procedurat për këtë shtetas dhe se do të vlerësohet nëse dorëzimi i tij do të bëhet me ekstradim formal apo përmes një marrëveshjeje reciproke ndërmjet dy vendeve. Ajo po ashtu informoi se për çështje orësh pritet që SPAK të përgatisë dokumentacionin e nevojshëm për të nisur procedurat e ekstradimit të Ervin Matës.
Informacioni u transmetua në “Shqipëria Live” dhe është publikuar nga Top Channel.
