Debatet në pasditën e programit Big Brother u paraqitën po aq të nxehta sa edhe diskutimet brenda shtëpisë. I pyetur për mënyrën e tij të lojës dhe për komentet fyese ndaj konkurrentëve të tjerë, Rogerti deklaroi se në jetën e përditshme nuk është një person i tillë, por brenda në shtëpi ka marrë përsipër të luajë një rol.
Ai tha se ka vepruar si “aktor i Machiavellit” dhe e përshkroi veten me fjalët: “unë jam aktori më i mirë që mund të ketë Shqipëria.” Sipas tij, shumë nga ofendimet që janë vënë re nuk kanë qenë nisur prej tij pa arsye: “Të gjitha ofendimet që kam bërë, mi kanë bërë këta të parët.” Rogerti theksoi se hyrja e tij në shtëpi dhe sjellja e ashpër ishin pjesë e një strategjie të qëllimshme për të ndarë dy konkurrentë: “Kur hyra në shtëpi ishte strategji për t’i rënë Mirit që ta shkëpusja nga Selin.”
Ai mohoi se qëllimi i sulmeve të tij kishte qenë thjesht për të ofenduar, duke deklaruar se synimi ka qenë për të infiltruar lojën dhe për t’u kualifikuar drejt finales: “Nuk i kam sulmuar për t’i ofenduar. Doja të futesha në lojë, të arrija në finale.” Në të njëjtën kohë, Rogerti vuri në dukje se ekziston një pjesë e publikut që e ka mbështetur për shkak të mënyrës së tij të drejtëpërdrejtë në shprehje: “Ka një publik që më ka dashur se kam folur troç.”
Deklarimet e tij erdhën gjatë diskutimeve në emisionin post Big Brother, ku përplasjet dhe shpjegimet për strategjitë e lojtarëve vazhduan të jenë teme kryesore. Top Channel
