Bisedimet për përfundimin e konfliktit SHBA-Iran në Islamabad mbeten të paqarta ndërsa dy delegacione janë në kryeqytetin pakistanez. Shtetet e Bashkuara njoftojnë se delegacioni i tyre, i kryesuar nga të dërguarit e Donald Trump, Steve Witkoff dhe Jared Kushner, mbërrin sot në Islamabad. Nga ana tjetër, Ministri i Jashtëm i Iranit, Abbas Araghchi, ndodhet tashmë aty, por Teherani thekson se vizita e tij është pjesë e një turi rajonal me tri ndalesa dhe se nuk ka planifikuar negociata të drejtpërdrejta me palën amerikane.
Araghchi është takuar me kreun e forcave të armatosura të Pakistanit, Asim Munir, dhe ka njoftuar se pas Islamabadit do të udhëtojë drejt Omanit dhe Rusisë për “konsulta mbi zhvillimet rajonale”. Përtej takimeve bilaterale, pala iraniane ka paraqitur para ndërmjetësve pakistanezë kërkesat dhe shqetësimet e saj lidhur me propozimet që kanë ardhur nga Shtetet e Bashkuara.
Sipas burimeve të përmendura, Irani vazhdon të kërkojë që amerikanët të vendosin një fund të bllokadës së Ngushticës së Hormuzit si kusht paraprak për hapjen e raundit të dytë të negociatave. Ndërkohë, përpjekjet diplomatike për një zgjidhje të konfliktit vijojnë, por paralelisht Shtetet e Bashkuara ushtruan presion për të detyruar palët kundërshtare të bëjnë lëshime.
Administrata amerikane njoftoi gjithashtu ngrirjen e 344 milionë dollarëve në kriptovaluta të lidhura me Iranin. Sekretari i Thesarit të Uashingtonit, Scott Bessent, deklaroi në X se “po monitorojmë paratë që Teherani po përpiqet me dëshpërim t’i nxjerrë nga vendi dhe po shënjestrojmë të gjitha linjat e financimit të lidhura me regjimin”. Sipas tij, qëllimi i masës është të goditet në mënyrë sistematike aftësia e Iranit “për të gjeneruar, lëvizur dhe rikthyer fonde”.
Situata mbetet e tensionuar dhe e paqartë lidhur me natyrën dhe shtrirjen e negociatave ndërmjet palëve, ndërsa takimet rajonale dhe masat financiare të SHBA-së vazhdojnë të ndërthuren në përpjekjet diplomatike.
