Më pak se dy muaj para nisjes së Kupës së Botës FIFA 2026, shqetësimet për sigurinë në Meksikë po rriten ndjeshëm, veçanërisht në qytetet pritëse. Në Guadalajara, situata është përkeqësuar: sipas të dhënave zyrtare 90.2% e banorëve thonë se ndihen të pasigurt, një rritje e fortë krahasuar me fundin e vitit 2025. Përkeqësimi lidhet me operacionin e forcave federale kundër Nemesio Oseguera Cervantes, i njohur si “El Mencho”, lider i Cártel Jalisco Nueva Generación (CJNG); ai u plagos gjatë operacionit dhe më pas humbi jetën, duke shkaktuar një valë dhune në rajonin e Jalisco që preku edhe qytete si Zapopan dhe Puerto Vallarta.
Në Zapopan, ku ndodhet stadiumi pritës i Botërorit, rreth 70% e banorëve deklarojnë se ndihen të pasigurt, një rritje e ndjeshme krahasuar me muajt e mëparshëm. Edhe në Puerto Vallarta, destinacion turistik i njohur, pasiguria është rritur nga 32% në pothuajse 60% brenda pak muajsh. Në rang kombëtar, qyteti i Irapuato shënon nivelin më të lartë të perceptimit të pasigurisë, me mbi 92% të banorëve që ndihen të pasigurt.
Në Mexico City perceptimi i pasigurisë mbahet relativisht i qëndrueshëm: rreth 44% në zonën e Coyoacán dhe rreth 58% në Tlalpan. Ndërkaq në Monterrey është vënë re një përmirësim të lehtë, me përqindjen e banorëve që ndihen të pasigurt e ulur në rreth 59.7%.
Siguria paraqet një prej sfidave kryesore për organizatorët e Botërorit, i cili këtë herë do të zhvillohet në tre vende: Meksikë, Shtetet e Bashkuara dhe Kanada. Autoritetet përballen me presion në rritje për të garantuar sigurinë e tifozëve dhe banorëve, ndërsa frika nga dhuna e organizuar vazhdon të jetë e lartë në disa nga zonat kyçe të turneut.
