Downing Street deklaroi se sovraniteti i Ishujve Falkland “i përket Mbretërisë së Bashkuar”, pas raportimeve se SHBA-të mund të rishikojnë qëndrimin e tyre ndaj pretendimit britanik për territorin. Sipas raportit, i cili citonte një email të brendshëm të Pentagonit të parë nga Reuters, dokumenti sugjeronte masa që SHBA-të mund të ndiqnin si hakmarrje kundër aleatëve që konsideroheshin se nuk kishin mbështetur mjaftueshëm fushatën e tyre në Iran.
Një zëdhënës i qeverisë britanike vuri në pah se “Ishujt Falkland kanë votuar me shumicë dërrmuese në favor të të qëndruarit një territor i Mbretërisë së Bashkuar përtej detit” dhe se qeveria “gjithmonë ka mbështetur të drejtën e banorëve të ishullit për vetëvendosje dhe faktin se sovraniteti i takon Mbretërisë së Bashkuar”. Zëdhënësi zyrtar i kryeministrit shtoi se qeveria “nuk mund të ishte më e qartë në lidhje me qëndrimin e Mbretërisë së Bashkuar” dhe se “sovraniteti i takon Mbretërisë së Bashkuar dhe e drejta e banorëve të ishullit për vetëvendosje është parësore”. Ai tha se ky qëndrim është shprehur qartë dhe vazhdimisht ndaj administratave të njëpasnjëshme të SHBA-së dhe se asgjë nuk do ta ndryshojë këtë. BBC News ka kontaktuar Pentagonin në lidhje me emailin e raportuar.
Rishikimi i statusit të Ishujve Falkland ishte përmendur si një nga masat e mundshme në email, së bashku me sugjerimin që SHBA-të mund të kerkonin pezullimin e Spanjës nga aleanca ushtarake e NATO-s për shkak të kundërshtimit të saj të fortë ndaj luftës së Iranit. Një zyrtar i NATO-s i tha BBC-së se traktati themelues i organizatës “nuk parashikon asnjë dispozitë për pezullimin e anëtarësimit në NATO ose përjashtimin”.
Kryeministri i Spanjës, Pedro Sanchez, reagoi duke theksuar: “Ne nuk punojmë bazuar në email-e. Ne punojmë me dokumente zyrtare dhe qëndrime zyrtare të mbajtura, në këtë rast, nga qeveria e Shteteve të Bashkuara”.
