E ardhmja e Milanit mbetet e paqartë, sipas bisedave që trajneri Massimiliano Allegri zhvilloi me Igli Taren dhe Giorgio Furlanin, pasi këtë sezon janë shumë futbollistë që rrezikojnë të humbin vendin në skuadër. Rafael Leao është një prej emrave për të cilin do të studiohen oferta të mundshme. Po ashtu, rinovimi i Cristian Pulisic, pas takimeve fillestare, ka ngadalësuar dhe më pas është pezulluar krejt; kontrata e tij skadon në qershor të 2027, dhe aktualisht as Milani e as përfaqësuesit e lojtarit nuk e shtyjnë më procesin. Gjendja është lënë pezull, ndërsa ftohtësia mes palëve ngre pikëpyetje.
Vendimet e ardhshme do të varen shumë nga përforcimet që klubi do të sjellë në verë, kështu që nuk është e sigurt që do të vazhdohet me të njëjtin modul loje. Në skemën aktuale as Leao e as Pulisic nuk kanë qenë shpesh në pozicionet e duhura, dhe nëse synohet një qendërsulmues dhe një sulmues i dytë, të dy nuk duket se janë zgjidhjet më të përshtatshme. Allegri ka tentuar për një sezon të tërë, por llogaritë aktuale nuk dalin.
Trajneri do të dëshironte në krye të sulmit Robert Lewandowskin, ndërsa Dusan Vlahovic vazhdon të mbahet në konsideratë. Për më tepër, po kërkohet një mesfushor me përvojë si Leon Goretzka, me të cilin bisedimet janë konstante. Synohet edhe një qendërmbrojtës për t’u bashkuar me Gabbia e Pavlovic, për të sjellë më shumë soliditet dhe cilësi në repartin e prapavijës. Në krahë pritet të bëhen ndërhyrje, por nuk po kërkohen lojtarë me profile të ngjashëm me Leao e Pulisic.
Pjesa tjetër e strategjisë së merkatos do të varet nga largimet e mundshme. Milani ka të ardhura thuajse të siguruara nga blerjet e lojtarëve që aktualisht janë me huazim, dhe mund të rrisë buxhetin përmes shitjeve. Christopher Nkunku është një emër që mund të sjellë të ardhura, por mundësi për shitje priten edhe nga futbollistë si Estupiñán ose Jashari.
