Shtatë ministra nga Partia Social Demokrate (PSD), forca më e madhe politike në Rumani, dhanë dorëheqjen ditën e sotme nga qeveria koalicionare pro-evropiane e kryeministrit Ilie Bolojan, duke e lënë atë pa shumicë parlamentare dhe duke rrezikuar aksesin në fonde të Bashkimit Evropian. PSD kishte kërkuar që Bolojani të jepte dorëheqjen deri të hënën, shprehur pakënaqësi për përpjekjet e tij për të ulur shpenzimet shtetërore për të reduktuar deficitin buxhetor — më i larti në BE — edhe pse më parë kishte mbështetur masat e qeverisë.
Shembja e mundshme e koalicionit katërpartiak, formuar 10 muaj më parë, pritet të sjellë javë apo muaj bllokim politik. Kjo mund të ndikojë negativisht në vlerësimin e kreditit të Rumanisë, tashmë në kufirin e fundit të gradës së investimit, dhe të rrisë kostot e huamarrjes. Një tjetër pasojë e mundshme është rreziku për rreth 27 miliardë euro fonde dhe kredi nga BE-ja.
Kryeministri Bolojan ka refuzuar të japë dorëheqjen dhe tha se do të emërojë zëvendësues të përkohshëm nga radhët e kabinetit aktual, të cilët mund të qëndrojnë në detyrë deri në 45 ditë derisa parlamenti të votojë një qeveri të re. PSD pritet të paraqesë një mocion mosbesimi në ditët në vijim, të cilin mund ta mbështesë Aleanca për Bashkimin e Rumunëve (AUR), partia e dytë më e madhe në parlament dhe aktualisht në krye të sondazheve. Zyrtarë të PSD-së njoftuan se edhe zëvendësministrat e tyre do të japin dorëheqjen sapo të paraqitet mocioni.
PSD deklaroi se është e gatshme të kontribuojë në formimin e një qeverie të re pro-evropiane dhe të mbështesë një kryeministër politik ose teknokrat që është i hapur ndaj shqetësimeve të qytetarëve dhe i aftë të sigurojë një shumicë parlamentare. Nga ana tjetër, Partia Liberale e Bolojanit përjashtoi mundësinë e një koalicioni të ri me të majtët, edhe pse pa ta është e vështirë të sigurohet një shumicë pro-evropiane.
Në takimet me presidentin Nicușor Dan, të katër partitë e koalicionit përjashtuan bashkëpunimin me opozitën e ekstremit të djathtë, por nuk arritën një marrëveshje për vazhdimin e qeverisjes së përbashkët. Koalicioni, krijuar për të frenuar rritjen e ekstremit të djathtë, ka qenë i tensionuar vazhdimisht kryesisht për shkak të politikave të shkurtimeve buxhetore.
