Presidenti i Shteteve të Bashkuara, Donald Trump, njoftoi se Irani nuk do të vazhdojë me ekzekutimin e tetë protestueseve femra, duke e cilësuar këtë zhvillim si “lajm shumë të mirë”. Në një postim në platformën Truth Social, ai deklaroi se katër prej grave do të lirohen menjëherë, ndërsa katër të tjera do të përballen me një dënim prej një muaji burg, dhe tha se vlerësonte faktin që autoritetet iraniane, sipas tij, kishin marrë parasysh kërkesën e tij për anulimin e ekzekutimit. Njoftimi erdhi disa orë pasi Trump vendosi të zgjasë armëpushimin me Iranin, në pritje të përgjigjes së Teheranit ndaj një propozimi amerikan për t’i dhënë fund konfliktit që zgjat prej afro dy muajsh.
Autoritetet iraniane kundërshtuan menjëherë këtë version. Gjyqësori iranian mohoi kategorikisht se gratë ishin në rrezik ekzekutimi, duke deklaruar se presidenti amerikan “është mashtruar sërish nga lajmet e rreme”. Sipas deklarimit zyrtar, disa prej grave janë liruar, ndërsa të tjerat përballen me akuza që nuk parashikojnë dënim me vdekje.
Organizatat e të drejtave të njeriut raportuan ndryshe, duke thënë se të paktën një nga gratë, Bita Hemmati, ishte dënuar me vdekje për pjesëmarrje në protesta dhe përplasje me forcat e sigurisë gjatë trazirave të janarit 2026. Sipas raportimeve, ajo dhe disa të tjerë u akuzuan për organizim protestash, hedhje objektesh ndaj forcave të rendit dhe dëmtim të pronës publike. Rasti i saj është dokumentuar nga organizata ndërkombëtare që monitorojnë situatën e të drejtave të njeriut në Iran.
Ndërkohë, organizata me seli në Norvegji raportuan se dy nga gratë, Golnaz Naragi dhe Venus Hosseininjad, janë liruar më herët me kusht, që në fund të muajit mars. Emrat dhe fotografitë e tetë grave i publikoi aktivistja iraniane Masih Alinejad, duke ngritur shqetësime ndërkombëtare për fatin e tyre.
Situata mbetet e paqartë për shkak të deklaratave kontradiktore nga pala amerikane dhe institucionet iraniane, ndërsa tensionet mes Shteteve të Bashkuara dhe Iranit vazhdojnë të jenë të larta.
