64 artistë u bënë bashkë në edicionin e 16-të të “PranverArt”, ku pikturat, skulpturat dhe punimet në qeramikë u prezantuan për publikun në Galerinë e Artit Tiranë. Përveç artistëve të njohur, ekspozita përmbante krijime të autorëve të rinj me teknika të ndryshme të artit pamor.
Skulptori Maksim Bushi vëren ndryshimet mes gjeneratave: “Është interesante çfarë mendonim ne dikur dhe si e mendojnë të rinjtë artin sot. Nëse ne jemi më figurativë, të rinjtë janë më të lirshëm, më abstragues, sjellin forma të reja, e shohin artin edhe si një mision.” Punimet në ekspozitë janë realizuar gjatë periudhës 2025–2026 dhe përfshijnë natyrën në të gjitha format dhe stinët, portrete, motive tradicionale dhe abstraksione. Bushi tregon edhe mesazhin e veprës së tij në karton dhe shpjegon titullin e saj: “Me ironi, e kam vënë titullin ‘Dita e Balonave’, nuk është vetëm një ditë që ngremë balonat e bukura, por janë balona që kapërcejnë dimensionin e një dite pranverore. Kjo balonë më shumë ngjan si një bombardues B2.”
“PranverArt” do të qëndrojë e hapur për artdashësit deri më 28 prill. Kjo ekspozitë shënon edhe shfaqjen e fundit të Galerisë së Artit Tiranë në ambientet aktuale, të cilat duhet t’i lirojë deri në fund të muajit prill me kërkesë të Prefektit. Për momentin nuk dihet se ku do të transferohet galeria. Bashkia e Tiranës, që ka në varësi këtë institucion, njofton se po punon për identifikimin e hapësirave alternative të përshtatshme.
Ekspozita paraqiti një panoramë të ndryshueshme të producimit artistik bashkëkohor në Shqipëri, duke bashkuar gjenerata dhe stilistika të ndryshme dhe duke prezantuar vepra të realizuara së fundmi nga një numër i madh autorësh. (Burimi: Top Channel)
