Këshilli Bashkiak i Tiranës vendosi dhënien e ndihmës së menjëhershme financiare për familjet dhe individët e prekur nga zjarri i datës 14 prill, që goditi pallatin pranë spitalit “Nënë Tereza” dhe dogji 71 apartamente. Qëllimi i propozimit është sigurimi i strehimit të përkohshëm për banorët e dëmtuar derisa të sistemohen në banesat e rikonstruktuara. Sipas projektvendimit të miratuar, përfituesit do të marrin një ndihmë mujore prej 40,000 lekësh, e cila do të vazhdojë deri në përfundimin e sistemimit në banesat e rikonstruktuara.
Për t’u përfshirë në program, familjet dhe individët duhet të dorëzojnë pranë njësive administrative dokumentacionin përkatës: dokument identifikimi, certifikatë familjare, dokumente pronësie mbi banesën e dëmtuar dhe një deklaratë për vërtetësinë e të dhënave. Projektvendimi kërkon gjithashtu një vërtetim nga Agjencia Shtetërore e Kadastrës që tregon se anëtarët e rritur të familjes nuk zotërojnë një banesë tjetër në të njëjtën njësi vendore. Njësitë administrative kanë përgjegjësi për verifikimin e dokumentacionit dhe për hartimin e listës së përfituesve.
Lista e përfituesve do t’i përcillet strukturave përkatëse për miratim dhe ekzekutim të pagesave. Ndihma financiare do të monitorohet çdo muaj dhe do të ndërpritet sapo familjet të sistemohen përfundimisht në banesat e rikonstruktuara. Në rastet kur konstatohet përfitim i padrejtë, do të nisin procedurat për kthimin e shumave të përfituara.
Efektet financiare të këtij vendimi do të mbulohen nga buxheti i Bashkisë së Tiranës për vitin 2026, brenda programit për mbrojtjen nga zjarri dhe mbrojtjen civile. Për zbatimin e vendimit, Drejtoria e Përgjithshme e Mbrojtjes Civile dhe Shërbimeve ndaj Qytetarit është ngarkuar të raportojë çdo tre muaj pranë Këshillit Bashkiak për listën e përfituesve dhe ecurinë e zbatimit.
