Shqipëria dhe Italia formalizuan një partneritet në shëndetin publik me nënshkrimin e Memorandumit të Bashkëpunimit ndërmjet Institutit të Shëndetit Publik (ISHP) dhe Instituto Superiore di Sanità (ISS), që synon avancimin e ekspertizës, forcimin e kapaciteteve dhe harmonizimin me standardet bashkëkohore. Ministrja e Shëndetësisë dhe Mirëqenies Sociale, Evis Sala, theksoi se memorandumit i vendoset një kornizë e qartë bashkëpunimi në fusha prioritare si survejanca epidemiologjike, rezistenca antimikrobiale, shëndeti mjedisor, siguria ushqimore dhe sëmundjet jo të transmetueshme, duke i dhënë rol inovacionit dhe teknologjisë në shëndetin publik. Përmendi gjithashtu angazhimin ndaj qasjes One Health, duke parë shëndetin si një ekosistem të ndërlidhur mes njeriut, mjedisit dhe kafshëve.
Si pjesë të zhvillimeve infrastrukturore, u njoftua nisja e punës për Korpusin e ri të Laboratorëve, ku do të përfshihen të gjithë laboratorët e sëmundjeve infektive dhe jo infektive. Për herë të parë do të jenë të vendosur dy laboratorë të nivelit të tretë të biosigurisë. Korpusi pritet të shërbejë për kërkime shkencore dhe për një përgjigje më të shpejtë dhe gjithëpërfshirëse ndaj emergjencave, të pajisur me teknologjinë më të fundit dhe me përputhje me standardet europiane të shëndetit publik.
Ambasadori i Italisë në Tiranë, Marco Albeti, vlerësoi zgjerimin e vazhdueshëm të partneritetit strategjik në sektorin e shëndetësisë dhe shpjegoi se memorandumi i nënshkruar është pjesë e marrëveshjes kuadër ndërmjet dy qeverive. Presidenti i Instituto di Sanita, Rocco Bellantone, e cilësoi memorandumet si një vlerë specifike të vazhdimësisë së bashkëpunimit ndërinstitucional, që integron dhe zhvillon marrëdhëniet e nisura ndër vite, duke i dhënë atij një strukturë të rinovuar dhe një program pune të orientuar drejt së ardhmes.
Memorandumi synon të forcojë bashkëpunimin institucional në fushën e shëndetit publik dhe të mundësojë zhvillimin profesional të teknikëve përmes shkëmbimit të praktikave, trajnimeve për stafet dhe rritjes së kapaciteteve përmes programeve të përbashkëta dhe eksperiencës së ndërsjelltë.
