Gjatë një takimi me operatorë të biznesit ushqimor, kryeministri Edi Rama u drejtua ndaj pjesëmarrësve duke theksuar detyrimin e tyre për të ofruar produkte të sigurta për konsumatorët. Ai shpjegoi se kërkesat e reja që po vendosen janë “paketa e dijes” që vjen nga Bashkimi Evropian dhe që synon t’i aftësojë bizneset për të tregtuar në vend produkte ushqimore të sigurte. Rama deklaroi se siguria ushqimore do të jetë “prioritet absolut” i qeverisë dhe ripërsëriti se qasja e institucionit do të jetë “krahë për krahë” me operatorët, jo në kundërshtim me ta, ndërsa objektivi qëndron përpara të gjithëve.
Kryeministri theksoi gjithashtu se standardet që do të aplikohen do të jenë të njëjta me ato të Bashkimit Evropian, duke nënvizuar nevojën për përshtatje me kërkesat e BE-së në fushën e sigurisë ushqimore. Mesazhi i tij për bizneset ishte i qartë mbi detyrën e tyre për të garantuar sigurinë e produkteve që vihen në treg dhe për të ndjekur udhëzimet dhe njohuritë që po transferohen nga BE-ja.
Në fund të fjalës, Rama mbylli me një mesazh reflektues, duke cituar një rrëfim lidhur me atë që Aleksandri i Madh i kishte kërkuar të shoqëruesve në shtratin e vdekjes. Ai transmetoi fjalët që, sipas tij, Aleksandri u tha atyre: “Do mblidhni mjekët më të mirë dhe do t’i vini të ecin pas arkivolit tim, mua do m’i lini duart hapur dhe rrugën deri te varri do ta shtroni me para. Njëri nga ata i thotë po për çfarë duhet t’i bëjmë këto? Sepse njerëzit i tha, duhet ta shohin që as njeriu më i fuqishëm mbi këtë tokë nuk i ikën dot vdekjes dhe doktorët më të mirë të kësaj tokë nuk kanë çfarë i bëjnë vdekjes. Dhe njeriu më i fuqishëm nga kjo tokë dhe kur ikën nuk ka asgjë në dorë, kthehet siç erdhi. Dhe njerëzit duhet të shohin që gjithë pasuria që mblidhet në këtë tokë, mbetet në këtë tokë’.”
Rama përfundoi duke u drejtuar pjesëmarrësve: “Ndaj mendoni edhe për këtë, sepse jeta ikën shumë shpejt miqtë e mi”. Top Channel
