Një hap i rëndësishëm është bërë në negociatat për Barcelonën rreth nënshkrimit të qendërmbrojtësit Alessandro Bastoni: raportohet se ekziston një marrëveshje në parim midis lojtarit të Interit dhe klubit katalanas për pesë sezonet e ardhshme. Kontakti zyrtar midis klubeve pritet të fillojë së shpejti, me synimin që Barcelona ta përfundojë transferimin para fillimit të Kupës së Botës, duke e vendosur këtë si një nga prioritetet e saj kryesore të merkatos.
Pjesa më e vështirë e negociatave lidhet me dallimet financiare për vlerësimin e lojtarit. Sipas “La Gazzetta dello Sport”, Bastoni është i përkushtuar për t’u larguar nga Interi dhe klubi italian është në dijeni të zhvillimeve dhe vendimit të lojtarit, por Interi kërkon rreth 70 milionë euro për shërbimet e tij. Interi shfaqet i hapur për formulime që përfshijnë një tarifë fikse më të ulët plus shtesa të tjera, por kjo strukturë nuk i përshtatet ofertës që preferon Barcelona.
Klubi katalanas do të preferonte një marrëveshje në rreth 45–50 milionë euro, që përfshinë edhe përfshirjen e një lojtari të ri nga skuadra e Barcelonës i cili mund të vlerësohet në mbi 10 milionë euro. Emra si Héctor Fort janë përmendur si mundësi të përfshirjes në negociata, megjithëse Interi ka interes specifik për disa profile të tjera.
Në këtë kontekst, Interi është i interesuar për mesfushorin suedez Bardghji dhe gjithashtu ka vënë në shënjestër portierin Aaron Yaakobishvili, i cili po kalon një sezon pozitiv në Andorra dhe vlerësohet të ketë potencial të madh. Të dy klubet, sipas raportimeve, po përpiqen të gjejnë një zgjidhje të pranueshme, por mbeten diferenca në vlerësim dhe në strukturën e pagesës që duhet tejkaluar para finalizimit të marrëveshjes.
Top Channel
