Komisioni për Edukimin nisi mbledhjen me një minutë heshtje për ndarjen nga jeta të mësuesit 52-vjeçar Alban Bejleri. Rasti i mësuesit nga Korça, i cili shpesh përshkonte 8 km në këmbë për të dhënë mësim vetëm për dy nxënës, shkaktoi përplasje mes deputetit demokrat Luçiano Boçi dhe ministres së Arsimit Mirela Kumbaro.
Boçi deklaroi se vdekja “për mua nuk është vdekje natyrale. Është vrasje e ngadaltë, është neglizhencë, hakmarrje politike”, duke akuzuar mungesën e reagimit institucional në kohë. Sipas tij, nuk janë dëgjuar shqetësimet e mësuesit për të ndërruar shkollë dhe kjo përbën “vrasje nga shpërfillja”.
Ministrja Kumbaro kundërshtoi akuzat, duke i quajtur “vrasje për herë të dytë” dhe theksoi se pretendimet politike janë të rënda dhe të papranueshme. Ajo tha se nuk pranon asnjë nga akuzat ndërsa institucioni po merret me familjen “me dinjitet edhe për dy fëmijët e tyre” dhe shtoi “Por nuk bëjmë show”. Duke iu përgjigjur thirrjeve të opozitës, Kumbaro kërkoi që denoncimi i PD t’i drejtohet organeve të drejtësisë: “Shkoni te organet e akuzës. Nuk pranoj asnjë nga fjalët e rënda qoftë ndaj meje apo ndaj sistemit arsimo”, deklaroi ajo.
Në debat, Boçi përgjigjej se nuk kishte thënë që ministrja kishte vrarë mësuesin, por paralajmëroi të mos bëhej “roli i viktimës”. Përplasja u zhvillua gjithashtu në kontekstin e projektligjit për transformimin e Qendrës së Shërbimeve Arsimore në Agjenci të pavarur, për të cilin opozita pretendon se shkel standardet e Bashkimit Europian. Ministrja ishte thirrur në mbledhje për këtë projektligj, ndërsa diskutimi u përqendrua në përgjegjësitë institucionale dhe akuzat për neglizhencë lidhur me rastin e mësuesit.
(Lajmi: Top Channel)
