Nga qelia, Ilir Meta akuzon Prokurorinë e Posaçme (SPAK) se ka mashtruar qëllimisht në një letër-porosi dërguar autoriteteve amerikane në mars 2025, ku, sipas tij, prokuroria e bën fakt të kryer se kreu i Partisë Liberale ka përdorur karta bankare. Në një reagim të gjatë në rrjetet sociale, Meta mohon kategorikisht përdorimin e ndonjë karte bankare, qofshin ato amerikane, europiane apo shqiptare, dhe thotë se nuk ka dijeni që bashkëpunëtorë, ish-të afërm apo persona të afërt me të të kenë përdorur të tilla karta.
Meta pretendon se çdo letër-porosi e nisur nga prokurorët e SPAK në SHBA ka pasur vetëm qëllimin e manipulimit dhe keqpërdorimit të autoriteteve amerikane kundër tij. Ai deklaron se asnjë nga letrat nuk u është nisur në përputhje me kontratën ligjore GSIS-LSI, të regjistruar në SHBA dhe në Shqipëri, dhe se synimi ka qenë krijimi i mjegullës, jo provimi i fajësisë. Sipas tij, prokurorët kanë qenë të bindur që nga fillimi se bëhej fjalë për një mashtrim, siç rezultoi edhe me rastin e McKeon Group.
Duke publikuar letër-porosin e datës 11 mars 2025, Meta akuzon se SPAK ka mashtruar me vetëdije Departamentin e Drejtësisë në SHBA, duke paraqitur si të provuar se ai ka përdorur të paktën tri karta bankare amerikane. Ai shtron se, në rast se prokurorët thoshin se dyshonin për përdorimin e kartave, dyshimi do të ishte i pranueshëm, por sipas tij, paraqitja si fakt e përdorimit të këtyre kartave përbën mashtrim të qëllimshëm dhe komprometon raportet e bashkëpunimit midis vendeve.
Meta përsërit se kurrë nuk ka qenë në ndonjë vend ku të mund të jenë përdorur kartat që prokuroria pretendon dhe thotë se në të ardhmen do të dalin të tjera raste të ngjashme, duke lidhur standardet e procedurave të ndjekura ndaj tij me standardet e hetimit, gjykimit dhe paraburgimit të tij.
