Kryetari i Partisë Demokratike, Sali Berisha, pasi u paraqit në SPAK për zbatimin e masës së sigurisë “detyrim paraqitje”, dha një deklaratë për mediat lidhur me gjyqin në GJKKO për çështjen “Partizani”, ku si dëshmitar do të jetë kryeministri Edi Rama. Berisha e cilësoi këtë përballje si “përballjen e shekullit” dhe deklaroi se në gjykatë do t’u tregojë shqiptarëve “të gjithë korrupsionin e Edi Ramës dhe çfarë qenie të ligë përfaqëson ky njeri”. Ai i bëri thirrje Ramës të vijë në sallën e gjyqit, por nëse “nuk ta mban”, ofroi të organizojë debate në studio televizive dhe tha se do të konsiderojë tërheqjen e kërkesës për të dëshmitar vetëm nëse pranohet kjo alternativë.
Berisha tha se do të paraqitet si dëshmitar edhe pse “vjen si i dënuar”, duke theksuar se parashkrimi është një çështje proceduriale, por se vepra penale përcaktohet nga gjykata. Ai nënvizoi se paraqitja në gjykatë si dëshmitar është e detyrueshme dhe i referohet Kodit, duke shtuar se Rama po përpiqet të shmangë këtë detyrim përmes një “këshilli mashtruesish” brenda Kryeministrisë, por sipas tij nuk do të mund ta bëjë këtë.
I pyetur nëse është gati të përballet në gjyq me kreun e grupit parlamentar të PS, Taulant Balla, për të njëjtën çështje, Berisha e akuzoi Ballën si autor të trillimit sipas të cilit Berisha i ka dhënë tokë të shpronësuar dhëndrit të tij. Ai deklaroi se toka në fjalë ka qenë pronë e familjes Begeja dhe familjeve të tjera dhe se nuk është shpronësuar kurrë. Berisha e quajti shpifjen e Ballës “e paskrupullt” dhe një ndër më të ulëtat, duke thënë se ajo po ndiqet dhe se ai disponon avokatë; nëse gjykatësi apo avokati kërkon praninë e tij, ai do ta zbatojë atë.
