Ushtruesja e detyrës së presidentes, Albulena Haxhiu, ka bërë thirrje për arritjen e një konsensusi ndërmjet partive politike për zgjedhjen e presidentit, duke nënvizuar se Kosova nuk duhet të shkojë në zgjedhje të jashtëzakonshme. Gjatë vizitës në Akademinë Përkujtimore për Ditën e Veteranëve të Betejës së Koshares, Haxhiu tha se kjo javë është vendimtare dhe shpreson që të nisin takimet ndërmjet partive, duke vënë në dukje se nëse ka vullnet, zgjedhja mund të bëhet brenda pak orësh. Ajo theksoi se nuk i takon asaj të ftojë partitë, pasi këto ftesa po bëhen nga kryeministri Albin Kurti si lider i partisë në pushtet, dhe u bëri thirrje partive t’u përgjigjen pozitivisht këtyre ftesave.
Haxhiu paralajmëroi se zgjedhjet e reja nuk janë në interes të vendit dhe se qytetarët nuk i duan zgjedhjet në këtë moment, duke kujtuar se zgjedhjet e fundit u mbajtën në dhjetor. Deklaratat e saj pasojnë një prononcim të zëvendëskryeministrit të parë dhe ministër të Jashtëm, Glauk Konjufca, i cili më 15 prill tha se zgjedhja e presidentit varet nga vullneti i opozitës dhe se do të tërhiqte kandidaturën e tij nëse opozita do të dilte me një kandidat të përbashkët, sepse sipas tij është më e rëndësishme që Kosova të ketë president sesa emri i tij.
Më herët, kryeministri Albin Kurti zhvilloi një takim me Lumir Abdixhikun, kreun e LDK-së, i cili përfundoi pa marrëveshje për presidentin. LVV-ja ka paralajmëruar edhe takime të tjera me LDK-në dhe PDK-në. Që nga 4 prilli, Haxhiu mban detyrën e ushtrueses së presidentit, pasi i skadoi mandati pesëvjeçar ish-presidentes Vjosa Osmani.
LVV-ja propozoi më 5 mars dy emra për president: Glauk Konjufcën dhe deputeten Fatmire Mullhaxha-Kollçaku, por procesi u ndal për shkak të mungesës së kuorumit. Të nesërmen, Osmani prezantoi një dekret për shpërndarje të Kuvendit dhe hapje të rrugës për zgjedhje të reja; dekreti u dërgua në Gjykatën Kushtetuese, e cila vendosi se ai nuk ka efekt juridik dhe përcaktoi 28 prillin si afat për zgjedhjen e presidentit, përndryshe shteti shkon në zgjedhje brenda 45 ditësh. LVV-ja fitoi në mënyrë bindëse zgjedhjet e parakohshme të 28 dhjetorit 2025 dhe ka 57 ulëse në Kuvend, numër i pamjaftueshëm për të arritur 80 votat e nevojshme në Kuvendin prej 120 deputetësh për zgjedhjen e presidentit.
