Prokuroria pranë Gjykatës së Shkallës së Parë të Juridiksionit të Përgjithshëm Fier përfundoi hetimet dhe dërgoi në gjyq kryeinspektorin dhe dy inspektorët e Inspektoriatit të Mbrojtjes së Territorit (IMT) Divjakë, të akuzuar për “Shpërdorim detyre” sipas nenit 248 të Kodit Penal. Hetimi, i përfshirë në procedimin penal nr.346, vërtetoi se këta funksionarë nuk i kanë ushtruar detyrimet ligjore për kontrollin e territorit në të paktën 31 raste.
Rastet e hetuara dhe dërguara më parë për gjykim për veprën “Ndërtim i paligjshëm” (neni 199/a) kishin marrë vendime të formës së prerë nga gjykata, por Inspektoriati Vendor i Mbrojtjes së Territorit pranë Bashkisë Divjakë nuk ka ndërmarrë veprimet funksionale të parashikuara nga ligji për kontroll dhe ndjekje të ndërtimeve pa leje. Edhe kur janë konfirmuar kundërvajtje administrative, nuk është ndjekur procedura e rregullt ligjore, që sipas prokurorisë përfshin konstatimin, vendosjen e gjobës, prishjen e objektit dhe kallëzimin penal.
Hetimi zbardhi se nuk janë ndërmarrë masa për vjeljen e masave administrative, duke tejkaluar afatet e parashkrimit. Kjo mosveprimtari ka shkaktuar, sipas prokurorisë, një dëm real në buxhetin e shtetit dhe të njësisë vendore. Për periudhën 2021–2022, dëmi ekonomik i llogaritur nga mosvjelja e gjobave është 11,170,000 (njëmbëdhjetë milion e njëqind e shtatëdhjetë mijë) Lek.
Prokuroria dërgoi çështjen për gjykim kundër të pandehurve: R. L., kryeinspektor i Inspektoriatit Vendor të Mbrojtjes së Territorit pranë Bashkisë Divjakë; S. M., inspektor pranë të njëjtit inspektoriat; dhe I. K., inspektor dhe ish-kryeinspektor pranë IMT Divjakë. Të tre janë të akuzuar për veprën penale “Shpërdorimi i detyrës” parashikuar nga neni 248 i Kodit Penal.
Në përfundim, Prokuroria pranë Gjykatës së Shkallës së Parë Juridiksionit të Përgjithshëm Fier thekson angazhimin për vënien para përgjegjësisë ligjore të punonjësve të shërbimit publik që kryejnë vepra penale të lidhura me detyrën e tyre.
