Ministri për Europën dhe Punët e Jashtme, Ferit Hoxha, theksoi se çdo cenim i sigurisë së Kosovës është edhe cenim i sigurisë së Shqipërisë dhe se paqja e stabiliteti në Kosovë janë prioritet i përbashkët ndërkombëtar. Në një prononcim për Top Channel, ai u shpreh se Shqipëria mbështet në mënyrë të pakushtëzuar sovranitetin dhe integritetin territorial të Kosovës dhe dënon çdo veprim ose retorikë që cenon stabilitetin, ndërsa nxit ruajtjen e qetësisë dhe dialogun e lehtësuar nga BE-ja.
Hoxha hodhi poshtë pretendimet për një “aleancë tripalëshe” kundër Serbisë, duke e quajtur këtë të pavërtetë dhe të ekzagjeruar. Ai sqaroi se Shqipëria nuk është pjesë e asnjë aleance rajonale të drejtuar kundër ndonjë vendi dhe se aleanca ku bën pjesë është NATO, e cila i ka dyert e hapura edhe për Serbinë. Politika e jashtme e vendit mbështetet në bashkëpunim, fqinjësi të mirë dhe integrim evropian; çdo bashkëpunim me partnerët synon forcimin e stabilitetit dhe mbështetjen e Kosovës në rrugën e saj euroatlantike, jo kundër ndokujt.
Ai theksoi përgjegjësinë për të mos rënë në retorikë të panevojshme dhe për të mos përshkallëzuar tensionet, duke preferuar qartësinë dhe konsistencën në politika përmes angazhimit konkret në NATO, Procesin e Berlinit dhe nisma të tjera rajonale dhe ndërkombëtare. Hoxha paralajmëroi se narrativa të cilla shpesh shërbejnë për diskutime të brendshme dhe se Shqipëria nuk do të bëhet pjesë e tyre, por beson në transparencë, bashkëpunim rajonal dhe respektim të angazhimeve ndërkombëtare.
Ai vuri në dukje rritjen e kapaciteteve ushtarake të Serbisë dhe bashkëpunimin e saj me aktorë të ndryshëm, përfshirë Rusinë dhe Kinën, por paralajmëroi kundër krijimit të klime alarmi që mund të çojë në përshkallëzim të panevojshëm. Siguria e Shqipërisë dhe rajonit mbështetet në arkitekturë konkrete sigurie, kryesisht NATO-n dhe praninë e KFOR-it në Kosovë si garanci për paqe dhe stabilitet. Përballë tendencave për militarizim, përgjigjja nuk është imitimi i pakontrolluar, por forcimi i bashkëpunimit me aleatët, rritja e kapaciteteve mbrojtëse në mënyrë të përgjegjshme dhe investimi në stabilitet afatgjatë. Shqipëria po zhvillon gjithashtu industrinë e saj të mbrojtjes dhe angazhohet në partneritete për mbrojtje e siguri me BE-në, duke vazhduar politikën e saj si faktor stabiliteti në rajon.
