Zv.kryetari i Komisionit të Sigurisë, Klevis Balliu, ka pasur një përplasje me kryetarin e Grupit Parlamentar të PS-së, Taulant Balla, gjatë diskutimeve për projektligjin e ri për shtetësinë. Balliu e cilësoi këtë nismë si të ngjashme me skemën e “pasaportave të arta” të ndaluar nga Bashkimi Europian, duke theksuar se ndryshon vetëm forma, por jo përmbajtja.
Ai kritikoi mungesën e mekanizmave të kontrollit dhe transparencës në projektligj, duke theksuar se nuk parashikon asnjë detyrim për raportim periodik në Kuvend. Sipas tij, iniciativa të tilla rrezikojnë të krijojnë hapësira për abuzim dhe favore për interesa të dyshimta. Balliu përmendi një vendim të Gjykatës Evropiane të 29 prillit 2025, që ndalon dhënien e shtetësisë në këmbim të investimeve të paracaktuara.
Në përfundim, ai paralajmëroi se vazhdimi në këtë drejtim mund të ndikojë negativisht në procesin e integrimit europian, duke shtuar kushte në raportin e IBAR dhe duke e ngadalësuar rrugën e Shqipërisë drejt Bashkimit Europian.
