Kryetari i Parlamentit të Iranit, Mohammad Bagher Ghalibaf, ka paralajmëruar se konsumatorët amerikanë mund të përballen me rritje të ndjeshme të çmimeve të karburantit. Ai bëri këtë deklaratë në një postim në rrjetin social X, duke i këshilluar amerikanët të shijojnë çmimet aktuale, pasi me bllokadën e paralajmëruar do të pendohen për çmimin prej 4-5 dollarësh për galon.
Deklarata e Ghalibaf vjen pas urdhrit të Presidentit amerikan Donald Trump për vendosjen e një bllokade detare në Ngushticën e Hormuzit, pas dështimit të negociatave për armëpushim me Teheranin. Ghalibaf theksoi se ky vendim mund të ketë pasoja të drejtpërdrejta në tregjet ndërkombëtare të energjisë, duke ndikuar në rritjen e çmimeve të naftës dhe karburanteve në Shtetet e Bashkuara.
Ai gjithashtu publikoi një grafik të çmimeve të karburantit pranë Shtëpisë së Bardhë dhe një formulë teknike, që disa e kanë interpretuar si një paralajmërim për tronditje të mundshme në tregjet globale të naftës.
