Në kuadër të përpjekjeve për të siguruar jetën dhe shëndetin e nxënësve, Policia e Durrësit, në bashkëpunim me Seksionin për Hetimin e Narkotikëve, realizoi operacionin “Shije e hidhur”. Ky operacion kishte për qëllim goditjen e aktiviteteve të prodhimit dhe shpërndarjes së lëndëve narkotike pranë shkollave të mesme.
Gjatë operacionit, u zbulua një bazë përpunimi të drogave sintetike dhe u arrestuan dy vëllezër, L. L. (20 vjeç) dhe R. L. (25 vjeç), të dy nga Kavaja dhe banues në Tiranë. Një tjetër person, Xh. L. (20 vjeç), është shpallur në kërkim. Vëllezërit kishin krijuar kushte për prodhimin e lëndëve narkotike, duke arritur të prodhonin drogë sintetike në formë karameleje.
Gjatë kontrollit të ushtruar pranë bllokut të shkollave, Policia gjeti dhe sekuestruar 50 paketime me lëndë narkotike të përpunuar, me një peshë totale prej 650 gramësh. Po ashtu, në banesën e tyre u gjetën xhelatine në formë karameleje, kanabis, 550 gramë material sintetik për prodhimin e karameleve, një peshore elektronike, kallëpe plastike dhe përbërës të tjerë për prodhimin e drogës.
Seksioni për Hetimin e Narkotikëve, në bashkëpunim me Prokurorinë, vazhdon punën për identifikimin e individëve të tjerë të përfshirë në këtë veprimtari kriminale. Materialet hetimore do të referohen pranë Prokurorisë së Durrësit për veprën penale “Prodhimi dhe shitja e narkotikëve”.
